“Ita hare katak kontribuisaun ema ho difisiente boot tebes ba dezenvolvimentu, tanba agora dadauk kooperativa difisiente komesa loke ona no ninia membru 365 iha teritoriu, inklui RAEOA,” dehan Evaristo da Conceção iha Salaun Federasaun Hanai Malu Aitarak-Laran, Kuarta (03/03).

Objetivu husi atividade ne’e, ema ho difisiente koko atu hakbiit an hodi promove ekonomia lokal, nune’e labele dependente ba estadu.

Nia haktuir, hanesan difisiente promove ekonomia lokál atu bele haforsa rendimentu ka ekonomia familia, nune’e mós bele kontribui reseita ba estadu.

Atividade ne’ebé maka kooperativa difisiensia hala’o maka hanesan, hanorin maluk difisiente sira bele rai osan iha kooperativa nomós bele foti osan hala’o sira nia atividade negosiu, kuda modo, inklui bele halo mós atividade seluk ne’ebé bele kontribui reseita.

“Partisipasaun sira atu ita bele promove ba sosiedade inkluzivu ka inklusivél nune’e sosiedade sira tau ona atensaun bele liga ekonomia ne’e ho ema difisiente atu labele esklui ema ho difisiente sira iha kotuk,” tenik nia.

Iha fatin hanesan SEKooP, Elizariu Ferreira hateten, membru difisiente sira hetan subsidiu mensalmente U$ 30, sira nia kooperativa la’o di’ak tebes desde uluk integra ba Hanai Malu ne’ebé akompãna husi SEKooP.

“Kooperativa Difisiente sira avansadu tebes, depois sira nia membru sira hetan subsidiu mensalmente $ 30, sira barak liu ne’e halai liu ba rai osan, tanba ne’e kooperativa difisiente la’o di’ak tebes,” tenik nia.

Tu’ir nia, agora dadaun sira nia membru iha 182 maka ativu iha kooperativa difisiente, maibé maluk difisiente balun mós involve iha kooperativu sira seluk.