Prezidente Bankada Partidu Unidade Dezenvolvimentu Demokrátiku (PUDD), António de Sá Benevides hatete, avaliasaun ba performasaun servisu membru governu sira iha loron 100 nian ne’e presiza tebes hodi hasa’e produtividade servisu iha futuru.

“Ha’u seidauk haree ministru ka sekretáriu estadu ida hatudu ninia servisu ida ne’ebé rigorozu iha loron 100 nian laran ne’e”, dehan nia, iha Uma Fukun PN, foin lalais ne’e.

Tuir nia, Membru governu sira seidauk hatudu performa servisu tanba dala ruma iha fulan tolu nia-laran laiha osan atu sira halo servisu. Ne’e duni, Primeiru Ministru presiza avalia hodi akompaña to’o fulan neen ka tinan ida.

Deputadu António hatutan, kuandu prosesu hotu la’o maibé sira la hatudu nafatin produtividade servisu, atu halo remodelasaun ka lae ne’e kompeténsia Primeiru Ministru nian atu halo desizaun.

Nia mós halo komparasaun ida katak ‘roda motór, tenke tau ba motór labele tau fali ba karreta’, signifika membru governu sira ne’ebé Primeiru Ministru koloka hodi ka’er pasta ministru balun la merese.

Haree husi aspetu hirak ne’e deputadu ne’e laiha esperansa ba bom ezekusaun Orsamentu Jerál Estadu (OJE) 2018 nian.

Antes ne’e, Vise-Prezidente Bankada FRETILIN, Francisco Miranda Branco, mós preokupa ho kapasidade membru governu balun nian ba ezekusaun orsamentu ho montante boot iha tempu fulan tolu nia laran.