Tersa, 18 Dezembru 2018 | Login
Komandante Jerál PNTL, Komisáriu Júlio da Costa Hornai Komandante Jerál PNTL, Komisáriu Júlio da Costa Hornai

Taa Malu iha Hudi Laran, Na’in Tolu Kanek Featured

DILI: Kazu konfrontasaun entre grupu rua ne’ebé deskonfia husi membru arte-marsiál ne’ebé akontese iha Bairru Hudi-Laran, rezulta ema na’in tolu hetan kanek.

Vítima na’in tolu ne’ebé hetan taa iha Hudi-Laran ne’e rua kanek kmaan no ida kanek todan.

Husi vítima tolu ne’e, na’in rua depois hetan tiha tratamentu fila kedas ba uma no ida seluk ho inisiál HDD mak kontinua baixa tanba kondisaun grave.

Komandante Jerál PNTL, Komisáriu Júlio da Costa Hornai, lamenta ho akontesimentu ne’e, tanba kazu ne’e envolve mesak juventude timoroan de’it.

“Ita nia joven sira mak fila oho malu fali hanesan ema fuik ho leet. La hanoin ba sira nia moris ba oin”, tenik nia, iha Kuartél Jerál PNTL, horisehik.

Nia informa, kazu ne’e akontese iha domingu (2/12), maizumenus tuku 17:24 iha Hudi-Laran. Bainhira grupu ida fila husi serimónia funerál hakoi mate isin kolega nian, grupu seluk hein iha dalan. Ho ida ne’e mak mosu akontesimentu taa malu hodi rezulta ema na’in tolu sai vítima.

Hanesan Komandante Jerál, Hornai lamenta tebes hahalok joven sira nian ne’ebé kontinua halo asaun krime iha ninia rain rasik.

Portantu Polisia sei la husik kazu ne’e kontinua akontese. Nune’e, fó ona orientasaun ba Komandante Munisípiu Dili atu hala’o operasaun para bele kaptura suspeitu sira hodi responsabiliza aktu ne’ebé sira halo.

Read 180 times
Rate this item
(0 votes)