Tersa, 18 Dezembru 2018 | Login
Ilustrasan konfrontu. FOTO: kompas.com Ilustrasan konfrontu. FOTO: kompas.com

PNTL Hein Mandadu Tribunal Kaptura Suspeitu Hudi-Laran Featured

DILI: Komando Polisia Nasionál Timor Leste Munisipiu Dili hein hela mandadau detansaun husi Tribunal Munisipal Dili (TMD) atu kaptura suspeitu ba kazu hakanek vitima na’in tolu iha Hudi-Laran, Dominggo (02/12).

Komandante Daruak PNTL Dili, Superintendenti Asistente Euclides Belo hatete polisia identifika ona suspeitu sira, inklui sira-nia paradeiru.

Maibé, tanba kazu ne’e la’os kaer ho liman polisia tenke hein mandadu detansaun husi tribunal.

“Maske ita identifika ona sira (suspeitu) maibé ita labele halo kapturasaun tanba laos flagarante de litu. Entaun ita presija mandadu husi tribunal,” informa Euclides iha nia servisu fatin, Kaikoli, Tersa (04/12).

Kona-ba suspeitu na’in hira mak polisia identifika, Euclides la fó sai tanba ho razaun ida ne’e nu’udar segredu prosesual.

“Tanba suspeitu sira sei livre hela entaun polisia presiza asegura dadus uluk, depois kuandu kaptura ona mak foin publika ba publiku ema na’in hira mak kaptura no see mak sira,” dehan nia.

Entretantu, iha Domingu domingu (2/12), maizumenus tuku 17:24 mosu konfrontasaun entre grupu rua ne’ebé deskonfia husi membru arte-marsiál iha bairru Hudi-Laran. Konfrontu ne’e rezulta ema na’in tolu kanek.

Ema na’in tolu ne’e hetan taa, rua kanek kaman no ida kanek todan. Hafoin hala’o tratamentu, na’in rua fila kedas ba uma no ida seluk kontinua baixa tanba kondisaun grave.

Komandante Jerál PNTL, Komisáriu Júlio da Costa Hornai, lamenta ho akontesimentu ne’e, tanba kazu ne’e envolve juventude timoroan de’it.

“Ita-nia joven sira mak fila oho malu fali hanesan ema fuik ho leet. La hanoin ba sira-nia moris ba oin”, dehan nia iha Kuartél Jerál PNTL, Segunda (03/12).

Komisariu Julio informa, kazu ne’e akontese bainhira grupu ida fila husi serimónia funerál hakoi mate isin kolega nian, no grupu seluk hein iha dalan. Ho ida ne’e mak mosu akontesimentu taa malu hodi rezulta ema na’in tolu sai vítima.

Hanesan Komandante Jerál, Hornai lamenta tebes hahalok joven sira nian ne’ebé kontinua halo asaun krime iha nia rai rasik.

Julio dehan, Komando Jeral fó ona orientasaun ba Komandante Munisípiu Dili atu hala’o operasaun hodi bele kaptura suspeitu sira atu responsabiliza aktu ne’ebé sira halo.

Read 329 times
Rate this item
(0 votes)