Membru PNTL Asalta UNTL Featured

By INDEPENDENTE Agostu 22, 2017 1053
membru PNTL duni tuir estudante tama kampus UNTL membru PNTL duni tuir estudante tama kampus UNTL

DILI: Iha tempu manifestasaun kontra karreta Prado iha Parlamentu Nasionál oin hamosu anarkizmu, membru Polisia Nasionál Timor-Leste (PNTL) halo asaltu ba sala aula Universidade Nasionál Timor Lorosa’e (UNTL), iha momentu prosesu aprendizajen la’o hela.

Estudante UNTL husi fakuldade haat, Medisina Jerál, Direitu, Filozofia no Agrikultura sai vítima ba hahalok membru PNTL sira nian, tanba tiru gás lakrimojéneu (gas air mata) ba universidade laran iha momentu ne'ebé estudante sira halo hela prosesu aprendizajen.

Durante asaun protesta loron ne’e la’o fakuldade haat ne’e kontinua aula tanba la hetan lisensa husi vise-dekanu.

Estudante Fakuldade Direitu, João Manuel Frederico, la kontente ho hahalok brutalizmu membru PNTL hodi halo asaltu ba universidade laran.

Ne’e duni, husu komandu PNTL atu responsabiliza ba atu ne'ebé ninia membru sira halo ona hasoru universidade.

Nia dehan, atuasaun polisia ne’e konsege rezulta estudante no funsionáriu balun hetan kanek iha aula, inklui mós estudante feto isin rua (gravida) trauma, tanba gás lakrimojéneu ne’ebé lansa ba universidade laran.

“Tenke identifika ema la’ós naran tiru de’it. Iha aula ne’e dosente fó hela matéria”, tenik João.

Nu’udar estudante husu ba komandu atu halo formasaun kle'an liu ba membru sira para bele sai profisionál liután. Hadomi sira nia servisu no buka atu asegura povu no rai doben ida ne’e.

Nune’e, Reitór UNTL, Francisco Miguel Martins hateten, UNTL tuir ninia estatutu nu’udar mós instituisaun públiku, la soi atu manifesta funsionamentu instituisaun públiku ninian.

“Tanba ne’e ha'u hasai tiha ona dia 15 ne’e, mais ita nia alin sira la oferese surat ida ne’e, mais ha'u laiha kbiit atu hapara sira ne’e parte seguransa mak bele atua situasaun sira ne’e”, dehan nia.

Nia dehan autoridade seguransa iha kbiit iha kompeténsia bele halo atuasaun hapara situasaun ne’e.

Entretantu, Ministru Interiór (MI), Longuinhos Monteiro, husu ba Reitór UNTL durante asaun ne’e, nia parte prontu atu asegura situasaun iha kampus hodi asegura prosesu aprendizajen.

“Ba universidade rasik, Reitór husu ajuda ruma Polisia presiza prontu atu asegura”, katak nia.

Nia dehan, fó ona orden ba polisia atu hapara anarkizmu. Kuandu la hapara Polisia iha obrigasaun uza forsa hodi hasoru manifestante sira.

“Ha'u fó orden ba Polisia bele uza forsa kuandu iha ona anarkizmu”, dehan Longuinhos.

Nia dehan, estudante sira tenke kalma hato’o sira nia aspirasaun kritika ka pensamentu. Iha dalan haruka reprezenta mai ko'alia mai iha Parlamentu Nasionál labele liu husi asaun violentu.

Nia esplika, tiru tanba buat ruma mosu la loos. Gás ne’e para uza atu tiru duni, agora mak anarkizmu mosu tan, haruka tiru tan.

Atu hapara buat ida anarkizmu no buat ida harahun ne’e tenke hanesan ne’e duni. Polisia uza ninia atributu atu hapara buat ida anarkizmu.

 

Rate this item
(0 votes)

Independente Digital TV