Kazu Sona Mate iha Hera, Polisia Kaptura Suspeitu 4 Featured

By Tome Amado Outubru 05, 2018 6286
Ilustrasaun mate-isin. FOTO: Thinkstock Ilustrasaun mate-isin. FOTO: Thinkstock

DILI: Polisia Nasionàl Timor Leste (PNTL) kaptura ona suspeitu na’in haat ne’ebé deskonfia sai autór ba kazu sona mate Carlos da Costa iha Hera, Munisipiu Dili, Domingu (16/09) madrugada.

Polisia konsege kaptura suspeitu na’in haat ho inisial FFR, LBG, AG no AC, iha Kuarta (03/10), hafoin simu karta detensaun husi tribunal iha Tersa (02/10).

Komandante Polisia Munisipiu Dili, Superintendente Xefe Pedro Belo kapturasaun ba suspeitu na’in haat ne’e ho kooperasaun husi autoridade local, inklui Ofisial Polisia Suku no Konsellu Polisiamentu Komunitariu.

“Tribunal fó karta detensaun iha loron 2 Outubru 2018 husu polisia atu ezekuta orden ida ne’e. Ne’eduni iha 3 Outubru 2018, SIK aranka ba Hera iha oras dader tuku 08:30 hodi lori joven na’in haat ne’e ho karta notifikasaun ne’ebé tribunal fó sai,” informa Pedro Belo iha nia knar fatin, horisehik.

Nia hatutan, polisia kaptura uluk suspeitu na’in rua, FFR no AC, iha Ailok-Laran, Hera, hafoin kaptura tan LBG no AG iha aldeia Mota Ki’ik, Hera.

Suspeitu ida ho inisial AG, Komandante ne’e informa, bainhira polisia to’o nia uma, suspeitu ne’e iha hela eskola, nune’e polisia husu ba ninia inan-aman atu ba bolu, hafoin polisia kaptura suspeitu refere.

Komandante ne’e dehan tan, SIK halo identifikasaun ba suspeitu sira no tuir mandadu tribunal sira tenke kumpri oras 72 hodi hein prosesu julgamentu.

Entretantu, suspeitu AG nia inan, Teresa Soares, tuir kedan nia oan mai iha edifisiu polisia Kaikoli Dili tanba la simu ho kapturasaun ne’e.

Tuir nia, bainhira kazu ne’e akontese, nia hamutuk hela ho nia oan-mane iha festa koremetan ida iha Hera.

“Ha’u la simu ha’u-nia oan hetan kondenasaun katak oho fali vitima Carlos. Momentu ne’e ha’u ho AG iha tenda laran, rona informasaun katak ema oho alin ida iha eskola vokasional ne’e, ami halai ba haree, inklui ha’u-nia oan,” dehan Teresa.

Tan ne’e, Teresa husu ba polisia sira atu ezekuta orden ho justu, labele halo kapturasaun ba ema ne’ebé la hatene buat ida.

“Ha’u-nia oan tinan sei ki’ik, nia la sala, nia la halo buat ida, nia mós la hatene akontesimentu ne’e, nia sei eskola. Ha’u husu ba imi lori fila nia,” dehan nia ho mata-been.

Rona lia-maka’as husi li’ur, Pedro Belo hakat ba hodi koalia ho suspeitu nia inan. Nia esplika katak polisia ezekuta de’it orden tribunal nian no polisia laiha kbiit atu hasai fali suspeitu bainhira seidauk iha desizaun husi tribunal.

“Se AG la sala, dalan ba nia atu livre sei mai. Maibé ami husu ba familia sira, inklui sira na’in haat mak tenke koopera ho polisia para kazu ne’e bele hetan dalan loos,” dehan Pedro.

Rate this item
(0 votes)

Independente Digital TV