×

Atenção

JUser: :_load: Não foi possível carregar usuário com ID: 430

Hasai Lia Fuan At, Jorge Matan Nakles

By Fevereiru 10, 2017 1214
Ilustrasaun baku malu Ilustrasaun baku malu

DILI: Jorge Gomes tenke sofre kanek iha nia parte matan tanba hasai lia-fuan at hasoru Antonio Soares nia kaben.

Antonio ho nia oan mane Delio Soares halo agresaun fiziku hasoru Jorge Gomes.

Iha Kinta (09/02), Tribunál Distritál Dili (TDD), hala’o julgamentu ba kazu krime ofensas integridade fiziku agravadu ho ameasa, ne’ebé komete husi arguidu Delio no Antonio Soares hasoru Jorge Gomes.

Tuir akuzasaun husi Ministériu Públiku (MP), iha 31 Novembru 2014 iha Taibesi, arguidu Delio baku lezadu iha bainhira lezadu tuur hela iha ninia banin nia uma.

Iha altura ne’e, arguidu Antonio mai hodi haruka nia oan dehan ema hanesan ne’e baku mate tiha deit no kaer lejadu hodi riba ba rai.

Hafoin rona akuzasaun ne’e, arguidu Antonio deklara ba tribunal katak, momentu nia oan baku lezadu nia la haree, tanba nia to’o iha fatin, nia oan mane la baku ona lezadu, tanba ne’e nia ba hafahe de’it sira nain rua.

“Ha’u la ameasa Jorge, lia-fuan dehan oho ne’e ha’u nunka hasai, ha’u so ba hafahe de’it sira na’in rua no dada ha’u-nia oan mane, tanba ha’u-nia oan mane mak baku Jorge,’’ dehan Antonio.

Problema nia hun, tuir Antonio tanba lezadu hasai lia-fuan at hasoru Antonio nia kaben bainhira husu osan ne’ebé lezadu nia kaben impresta.

Iha fatin hanesan Jorge deklara, nia laiha intensaun hasai lia-fuan at hasoru arguidu nia kaben, maibé tanba nia selu ona osan impresta ho nia funan, maibé arguidu nia kaben kontinua telephone nia.

Nia dehan, nia kaben impresta osan $75 husi arguidu nia kaben no sira selu ona ho osan hamutuk $350.

“Ha’u la’os hasai lia-fuan caral** ne’e, maibé ha’u dehan osan caral** ne’e fo hotu ona mós husu saida tan. Ha’u la’os dehan tia mak caral** maibé, ha’u dehan osan caral**,” dehan nia.

Jorge mós konfuzaun, tanba sa liu tiha semana ida bainhira nia ba nia banin nia uma mak Delio baku nia.

“Ha’u ba ha’u-nia banin sira mak nia oan hetan ha’u hodi dehan ‘Ó mak jagoan ne’e ka?’ depois mai baku ha’u,’’ katak Jorge.

Audensia julgamentu ne’e adia fali ba loron seluk hodi rona tan testamuña sira seluk.

Audensia  julgamentu ne’e prezide husi Juiz Singular Antonio Helder do Carmo. MP reprezenta husi prokuradór Napoleão Xavier, no arguidu hetan asistensia legal husi Defensór Públiku Rui Guterres.

Rate this item
(0 votes)

Independente Digital TV