Sosiadade Sivil Konsidera PN Haluha Ratifika Tratadu FM Featured

By INDEPENDENTE Marsu 10, 2019 9214

DILI: Iha 6 Marsu 2018 liu ba governu Timor Leste ona Australia asina ona akordu kona-ba Fronteira Maritima iha Nova Iorke no lori fila ba idaidak nia nasaun hodi bele ratifika. Maibé hafoin tinan ida, estadu Timor Leste seidauk konsege halo ratifikasaun ba tratadu refere.

Kestaun ne’e hamosu preokupasaun husi Sosiadade Sivil sira ne’ebé konsidera estadu Timor Leste, liu-liu Parlamentu Nasionál ne’ebé iha knar atu halo ratifikasaun, haluha ona.

Peskizadór Association Justice And Right (AJAR), Inocensio Xavier hatete, akordu ne’ebé repezentante Timor Leste, Hermenegildo Pereira, ho reprezentante Australia Jullia Bishoop asina sai nu’udar solusaun ba luta Timor Leste atu hetan ninia soberania.

Maibé, lamentavel tanba maske akordu ne’e iha ona, estadu Timor Leste seidauk konsege atu halo ratifikasaun.

“Ita manan ona soberania tasi ho Austrália. Tuir loloos ita ratifika lalais tratadu fronteira maritima hodi asegura ita-nia rikusoin iha tasi laran, maibé Parlamentu Nasional husik de’it lei ne’e to’o agora,” deklara Inocensio ba jornalista iha Parlámentu Nasionál, Kinta (07/03).

Tuir nia, impase politika ne’ebé Timor Leste hasoru halo orgaun soberania sira, liu-liu governu no PN, abandona atu ratifika tratadu FM.

Iha fatin ketak, Diretór Ezekutivu Luta Hamutuk. José Alves da Costa hatete, loloos PN labele adia ratifikasaun ba tratadu FM to’o tinan ida.

“Maski impase polítika akontese iha rai laran maibé Parlamentu Nasionál mós tenke tau konsiderasaun ba asuntu Fronteria Maritima,” dehan José.

Tan ne’e, Diretór ne’e ezije ba PN atu iha fulan Marsu nia laran tenke tau iha ajenda ratifikasaun ba tratadu Fronteira maritime.

“Austrália ratifika ona, maibé tanba saida mak Parlamentu Nasional (Timor Leste) la ratifika tratadu ne’e?,” nia kestiona.

PN Hein Governu

Prezidente Parlamentu Nasionál (PN) Arão Noe hatete, PN seidauk ratifika tratadu FM tanba governu seidauk aprezenta dokumentus negosiasaun delimitasaun FM.

“Ha’u simu informasaun husi governu presiza hadia ka altera tan lejislasaun balun par bele armonija liu tan vinkula iha area sira ne’ebé sai ona Timor Leste nian”, informa nia ba jornalista sira.

Tuir Arão armonijasaun dokumentus ne’e importante tanba bainhira tama hahú ona implementa area hirak iha Tasi Timor sai hotu Timor Leste ninian.

“Entaun tenke halo kedas lejislasaun par bele garante atividade iha tasi Timor ba future,” dehan nia.

Prezidente PN ne’e dehan, PN kontinua hein esforsu governu atu konklui lalais dokumentus sira ne’e atu TL bele hetan ninia direitu 100%.

Entretantu, Primeiru Ministru Taur Matan Ruak deklara, governu sei serbisu maka’as hodi prepara dokumentus atu bele lori ba PN hodi ratifika.

Maske la fó sai kona-ba data fiksu, maibé PM Taur hatete de’it katak iha tempu badak nia laran sei halo ratifikasaun ba tratadu FM.

“Serbisu preparativus ne’e halo maka’as loos, ne’ebé hein katak iha tinan ida ne’e nia laran sei halo ratifikasaun,” deklara PM Taur.

Rate this item
(0 votes)

Independente Digital TV