Kondisaun ida ne’e halo prosesu aprendizajen iha eskola ne’e la’o iha situasaun ne’ebé la seguru no fó risku ba seguransa estudante sira, inklui mós manorin sira.

Koordenadór EBF Mauream, José Isaac Amorin hatete, kondisaun eskola ne’e aat kleur ona no to’o ohin loron seidauk hetan atensaun husi parte kompetente.

Bainhira udan monu rai, bee mata ba sala laran nune’e obrigatoriamente sira tenke haruka estudante sira fila ba uma.

"Eskola ne'e kondisaun at kleur ona, tanba airin balun monu ona, kalen sira balun nakloke hotu ona. Nune'e bainhira udan estudante sira ami haruka iha uma de'it," dehan nia ba jornalista Jornal INDEPEDENTE, via telefone, Sesta (06/02).

Aleinde kondisaun fiziku edifisiu ne’ebé besik monu, limitasaun sala aprendizajen mós sai problema boot ida.

Estudante husi klase 1 to’o klase 6 tenke uza hamutuk sala aula tolu, nune’e sala aula ida klase rua mak uza hamutuk.

Iha sala ida akumula estudante na’in 25 to’o 28, kondisaun ne’e konsidera la kondusivu ba prosesu aprendizajen.

Problema seluk ne’ebé eskola ne’e hasoru mak falta manorin. Husi manorin na’in haat ne’ebé iha, na’in ida sofre moras, nune’e hela na’in tolu mak ativu hanorin estudante sira.

José hatete, nia parte dala-barak ona hato’o proposta ba parte edukasaun munisipiu no Ministeriu Edukasaun, maibé to’o ohin seidauk iha rezultadu.

"Ami haruka bebeik karta ba ministériu, ekipa mai haree ona, maibé to’o agora ami seidauk hetan fali informasaun ruma.Grasa a Deus, ekipa ida husi relijiaun Adventista mak mai ajuda ami, maibé sira troka mak kalen ne'ebé kuak," katak nia.

Iha parte seluk, voluntáriu edukasaun ida ne'ebé ho voluntáriu loke kursu báziku Inglés iha EBF Mauream, Asala Prego fó sasin katak, kondisaun eskola refere difikulta duni estudante sira-nia prosesu aprendizajen, liu-liu iha tempu udan.

"Ha'u iha inisiativa rasik loke kursu lingua Inglesh baziku kuaze fulan ida hanesan ne'e. Maibe tempu udan partisipantesira labele aprende, tanba kondisaun eskola grave,” dehan nia.

Asala hatutan, bainhira mosu inundasaun iha area refere, nia halo live streaming no ekipa husi edukasaun munisipiu no nasionál konsege ba haree, maibéto’o ohin seidauk iha rezultadu ruma.

"Iha loron hirak liu ba, ema balun ne'ebé iha hanoin di’ak ajuda kalen no material seluk ne'ebé atu satan netik udan no loron manas,” dehan nia.

Entretantu, to'o notisia ne'e publika, Jornalista Jornal INDEPEDENTE, seidauk konsege hetan komentariu husi parte kompetente.