Domingu, 21 Outubru 2018 | Login
Vise-Ministra Finansas, Sara Lobo Brites Vise-Ministra Finansas, Sara Lobo Brites

Governu Aprezenta OJE 2018 Ho Karakter Urjénsia Featured

DILI: Hafoin Parlamentu Nasionál (PN) aprova programa governu nian, órgaun ezekutivu konsentra hikas ba Orsamentu Jerál Estadu (OJE), tanba ne’e entrega ona ba Parlamentu Nasionál ho karakter urjénsia hodi bele diskute lalais iha plenária.

Vise-Ministra Finansas, Sara Lobo Brites hateten, OJE 2018 ne’ebé governu entrega ba Parlamentu Nasionál konsidera ho karakter urjénsia.

“Ami haree OJE ne’e ho karakter urjénsia, tanba ne’e ami mai entrega ona hanoin katak ita bele diskute lalais atu bele aprova no promulga”, dehan nia, iha Uma Fukun PN, horisehik.

Iha OJE ne’e ninia natureza alokasaun normál hanesan baibain ne’ebé ba kada item mak hanesan saláriu no vensimentu, bens servisu, fundu kapitál umanu, fundu kapitál menór no fundu kapitál dezenvolvimentu.

Iha fatin hanesan, Prezidente Parlamentu Nasionál, Arão Noe de Jesus hatete, haree ba proposta OJE ho pedidu urjente sei baixa karakter ne’e ba komisaun C Asuntu Finansas Públiku atu haree hodi halo pareser mai iha plenária atu deside.

“Sei baixa ba Komisaun C atu haree hodi fó nia pareser nune’e mai debate iha plenária hodi deside nia karakter debate ne’e ho urjente ka normál”, dehan nia.

Kuandu sira halo nia relatóriu pareser mai iha Plenária mak vota ho karakter urjénsia maka tenke debate ho urjente, maibé la liu tenke debate tuir prosesu normál.

Read 902 times
Rate this item
(0 votes)