Maun alin inan feton sira mundu nia mudansa ne’e mai husi kreatividade traballadór sira nian, tanba ne’e traballadór sira mak sai heroi ba mudansa tomak iha mundu.

Nu’udar kandidatu Prezidente Repúblika sei garantia servisu nain sira nia direitu, oinsá konvense governu hodi hasa’e traballadór  rai laran sira nia salariu, no kria kondisaun servisu ne’ebé dignu atu ema labele viola bebeik servisu nain sira nia direitu.

Governu tenke proteje nia sidadaun sira ne’ebé sai hanesan traballadór, tanba obra hotu-hotu mai husi sira.

Ba maun alin sira ne’ebé dadaun servisu hela iha Irlanda, Inglatera, Australia, Sul Korea, ne’ebé husik nia rai ba servisu iha rai seluk, tanba hakarak atu hadia moris familia nian.

“Imi hotu nia kontribuisaun ohin ita ba foho ita hetan uma mutin barak, balun haruka alin sira ba eskola iha rai liur no rai laran, ha’u nu’udar imi nia maun alin ha’u louva no konsidera imi sai hanesan heroi ba rai ida ne’e, ba oin ha’u sei ko’alia ho governu atu bele ko’alia ho nasaun sira ne’e, atu bele proteje no kria kondisaun servisu dignu ba imi hotu nu’udar servisu nain ida,” dehan nia, iha Kampu Natarbora, Tersa (08/03).

Bainhira sai PR sei orienta governu atu halo investimentu iha setór produtivu, dezenvole ekonomia rai laran hodi loke kampu servisu ba joven sira.

“Ha’u husu ho hakraik aan ba maun alin sira iha Irlanda, Inglatera, Autralia, Sul Korea atu sai ha’u nia jurukam, hateten ba familia, kolega sira atu vota ba Assanami númeru 16 hodi lori rai ne’e bao in,” dehan nia.

Tinan 20 ukun aan ona, joven hotu-hotu tenke iha responsabilidade labele husik rai ne’e nune’e nafatin, Xefe Estadu tenke orienta governu atu bele kria kondisaun hotu-hotu ba servisu nain sira.

Assanami kompromete bainhira sai Prezidente Repúblika sei loke palasiu ba povu, sei hala’o enkontru reguler ho servisu nain hotu-hotu  hodi rona sira nia preokupasaun, nune’e bele orienta governu hodi  responde.