Eis Ministru Agrikultura no Peskas ne’e hatete, nu’udar kandidatura ne’ebé mai mós husi ema agrikultór hatene momoos problema saida mak povu agrikultór sira enfrenta durante ne’e.

“Ha’u koñese didi’ak imi-nia probelma, ha’u hakarak moderniza setór agrikultura, area peskas nian ita hakarak ró ne’ebé ho kodiasaun naton hodi bele peska to’o tasi klaran nune’e kaer ikan ne’ebé naton atu sira bele hadia moris,” dehan nia, iha kampu futebol Natarbora, Tersa (08/03).

Assanami informa, riku soin tasi sai fontes reseitas importante bele hatama osan ba estadu, tanba tasi Timor luan dala tolu liu rai maran, riku soin tasi barak tanba ne’e presiza explora ho diak.

Ba inan aman garikultór sira teknolojia ne’e importante hodi fasilita toos nain sira, ko’alia agrikultura elementu tolu importante mak haesan rai, bee no loron matan.

“Durante ne’e ha’u luta para ita tenke iha barazen atu nune’e iha bee naton ba ema, ba animal, aihoris  no bee ba enerjia ikus mai evaporasaun bee sa’e ba leten, ita mós iha udan ne’ebé naton no regular ne’ebé diak la’os ita tuir mudansa klimatika, tanba ne’e karik sai Prezidenre Repúblika ha’u sei orienta tau matan duni seitor agrikultura nu’udar alvu prinsipal atu bele liberta puvu,” dehan nia.

Eis Ministru MAP ne’e dehan, agrikultura ne’e la’os halo de’it produsaun, maibé oinsa asegura seguransa alimentar, hasa’e produsaun hodi faan para bele hetan osan hodi liberta povu agrikultór husi kiak no mukit.

Setór agrikultura ne’e hanesan setór ne’ebé kontiniu no regular ba inan aman sira, maiske rai ne’e la’os rai boot hanesan ho nasaun seluk, maibé presiza ultiliza masimu atu asegura siguransa alimentar, kria kampu servisu no fó rendimentu ba inan aman sira.

Material teknolojia importante sira hanesan, trator boot no hand trator sira presiza tebes atu utiliza, ba peskador sira tenke utiliza ona ró ne’ebé modernu.

Entretantu bainhira sai PR, sei orienta governu tau osan iha banku para fasilita kreditu ba agrikultór no peskadór sira ne’ebé sai inisiatór ba transformasaun produtu akrikula ba industria.

Servisu agrikula ne’ebé inan aman sira halo ne’e servisu kontinuidade husi beiala sira uluk sei tradisionalmente, maibé tempu mudan aan hakarak ka la lakohi tempu ida agora tenke transforma ba teknolojia, entaun presiza promove politika jeral hodi orienta governu para bele kria kondisaun ba sira.