Figura iha Timor-Leste ne’ebé tuir Lere nia sei la kritika mak Prezidente CNRT, Kay Rala Xanana Gusmão, Primeiru Ministru Taur Matan Ruak, no Prezidente Fretilin no kandidatu PR númeru 6, Francisco Guterres Lú Olo.
“Ha’u moe bainhira ha’u kritika maun na’in tolu, Xanana Taur, Lú Olo. Ha’u hatudu liman ba sira hanesan ha’u hatudu fali ba ha’u, tanba ne’e ha’u lakohi kritika sira,” dehan Lere durante ninia kampaña iha Munisipiu Bobonaro, Kuarta (09/03).
Tuir Lere, nia, Xanana, Taur no Lú Olo hanesan ema ida de’it, tan ne’e nia sei la kritika katak Xanana, Taur ka Lú Olo sala.
"Ha'u lakohi kritika ema ida, hatete katak ha'u-nia maun Xanana sala, Taur sala, Lu Olo sala se Sira komete sala hanesan komete ha'u nia sala, se sira komete di'ak ne'e ha'u di'ak tanba Ami ema ida de'it, ha'u moe bainhira ha'u kritika maun na'in tolu, Xanana, Taur, Lu Olo,” nia afirma.
Iha oportunidade ne’e, Lere hato’o ninia lamentasaun ba lia-fuan husi Sekretariu Jeral partidu Fretilin, Mari Alkatiri, liu-liu ba lia-fuan ‘Lere Anan Timur ne'e lere tuun, lere sa’e de'it’.
"Ha'u ke nia hadomi tebtebes ha'u, kuandu nia rona ameasa ruma nia dehan ‘Jeneral Lere ema atu asaltu ha'u’, Ha'u dehan ‘o lalika fi'ar, Lere mak dehan asaltu ita-boot o tenke kuidadu, lian bosok, o konfia Lere, ema sei la asaltu’, maibé iha Kampaña ataka mós, maibe buat ida ne'e ha'u-nia maun, ha’u respeita maun mais ha'u-nia naran Lere ema seluk labele temi iha públiku so ha'u-nia uma-lisan mak bele temi," dehan nia.
Tuir nia, bainhira Alkatiri temi nia naran ba buat di’ak ne’e bele maibé ba buat ne’ebé la di’ak ne’e labele.
“Temi Lere ba bu'at di'ak nian bele temi, mais hatun Lere labele, dala-ruma ema politiku koalia demais, emosaun mós sae, entaun ema idaidak kontrola nia emosaun,” dehan jeneral reformadu ne’e.
Nia hatutan, uluk iha tempu rezistensia militar Indonezia tauk bainhira rona Lere nia naran, maibé iha tempu ukun an Alkatiri hatete fali Lere ne’e ba lere tuun-sa’e.
“Agora Lere Anan Timur sai Prezidente (Repúblika) entaun sei lere mak aikakeu sira ne'e, lere mak ema arogante no lere mak ema koruptor sira ne'e. Ne'e Prezidente ha'u-nia knar no ha'u brani, ha'u la'os sivil mak sai prezidente. Ambisiozu sira mós ha’u sei lere hotu, korruptór ho kaan kadeira sira mós ha'u sei lere hotu, tanba ohin loron funsionariu mate klamar sira mós iha sei lere hotu," nia deklara.
Tan ne’e, Lere husu ba lider sira, kandidatu PR no ekipa susesu sira atu durante iha tempu kampaña lalika ho emosaun, maibé koalia de’it mak vizaun no misaun nu’udar PR.
“Sira hakarak kritika ema atu hatun ema, nia hodi sae, mais ema hotu mesak Timor-oan, see mak sa’e (ba) prezidente mós Timor-oan ukun nafatin Timor-oan, la'os ema seluk,” nia dehan.
