Agostino hatete, maske PDRT foin halo konsolidasaun maibé haree katak partidu ne’e iha nia forsa.
“Pratikamente ha'u foin simu knar hanesan Koordenador komite sentral no ami komesa husi Agostu hafoin segunda komferensia hodi hili ha'u sai nuu’dar Prezidente Partidu no ami re-estrutura fila fali, ema mai barak. Tanba ne’e, partidu ne’e iha ona programa ne’ebé di’ak no kondisaun atu ukun husi Prezidente Republika to’o Governu no ita iha kondisaun tomak," dehan nia bainhira hala’o dialogu iha Aldeia Ailele-Hun, Suku Kamea, Postu Administrativu Kristu Rei, Munisipiu Dili, Domingo (06/03).
Nia hatutan, ema barak afilia mai partidu ne’e tanba haree ba partidu nia programa ne’ebé di’ak hodi kandidata Anacleto Bento Ferreira ba Prezidente Republika, hodi halo mudansa ba dezenvolvimentu rai ida ne’e no lori povu ba moris di’ak.
"Realidade nasaun ida ne’e agora dadauk iha impase politika, nune’e partidu ne’e deside hodi hili no kandidata Anacleto ba Prezidente Republika atu halo mudansa ba rai ne’e. Tanba Kandidatu Anacleto ema ne’ebé iha vizaun di’ak no mós kapasidade matenek ne’ebé masimu atu ukun Rai ne’e,"haktuir nia.
Nia esplika, iha Suai, Munisipiu Kovalima, partidu forma ona nia kuadrus hamutuk rihun ualu (8.000), iha Ainaro iha kuadrus rihun lima (5.000), Ermera iha rihun sia (9.000) no Bobonaro iha rihun ualu (8.000). Tanba ne’e, nia dehan, PDRT laos kiik hanesan uluk, maibe agora PDRT bele koalia no ukun ona.
Entretantu, nia haktuir, bainhira Anacleto eleitu ba Prezidente Republika haree uluk mós ba dezempregu, tanba taxa dezempregu as tebes iha nasaun ida ne’e.
Enkuantu, nia akresenta, bainhira Kandidatu manan iha segunda ronde, maibe karik Kandidatu Anacleto labá, PDRT laos atu ba intrega an deit.
“Enkuantu ha'u sei lidera sei la akontese ida ne’e, maibe ita ba ho negosiasaun hodi deskuti programa, ida ne’e mak ita nahe uluk iha meza. Nune’e husu ba Prezidente Republika, ami apoiu Nai Prezidente Republika ita boot nia politika atu influensia governu atu haree tok dezempregu ne’e too tinan hirak mak ita bele halo hotu,” nia akresenta.
Tanba ne’e, nia dehan, ba see deit mak atu ukun rai ida ne’e tenki hakotu dezempregu iha nasaun ida ne’e.
