AINARO:  Kandidatu Prezidente Republika numeru 5, Anacleto Bento Ferreira hatete, Timor-Leste ukun an tinan 20 ona maibé seidauk iha hanoin no mekanismu ida atu estabelese Tribunal Militar, tan ne’e bainhira nia eleitu sai PR nia sei koalia ho governu hodi estabelese tribunal refere.

Anacleto hatete, kompetensia ne’ebé Konstituisaun fó ba Prezidente Republika mak nia hanesan Komando Supremu ba Forsa Armadas no Defeza nian sei apoiu governu hodi modernaliza no profesionaliza forsa armadas no seguransa.

"Tantu se ita-nia kazu ruma ne’ebé ligadu ho aktus membru militar no polisia nian ita lori fali ba tribunal sivil mak halo julgamentu, buat ne’ebé bele ho lia-fuan Indonesia nian katak ‘tak ada akar, rotan pun jadi’, ida ne’e mak ita uza hela to’o ohin loron, tinan  20 ha'u hanoin tempu to’o ona atu hanoin loloos tak ada akar, ita buka duni rotan, ida ne’e atu sai alternative," dehan nia iha kampaña door to door, iha Postu Ainaro Vila, Munisipiu Ainaro, Tersa (08/03).

Nia hatutan, tempu to’o ona hanesan Prezidente Republika sei inisia prosesu ida hodi hamosu Tribunal Militar iha Timor-Leste.

Entretantu, Diretór Komisaun Nasionál Eleisaun Munisipiu Ainaro, Felisiano da Costa dos Santos informa,  durante kampaña kandidatu Prezidente Republika iha Ainaro lao ho di’ak tanba kandidatu sira kumpre duni oras ne’ebé iha.

“Ita hotu hatene katak kampaña hahú iha loron 2 Marsu to’o ohin, CNE nia observasaun durante ne’e lao di’ak no kandidatu sira kumpre duni orariu ne’ebé sira hatama,” dehan nia.

Tuir observasaun jornalista jornal INDEPENDENTE iha terenu nota katak kampaña tipu door to door husi kandidatu númeru 5 ne’e iha Ainaro hetan observasaun husi observador sira no husi CNE.

Aleinde ne’e, militante sira ne’ebé partisipa iha kampaña door to door ne’e maizumenus liu na’in 100 no laiha labarik mak partisipa.