Ekipa susesu husi kandidatu Prezidente Repúblika, Armanda Berta dos Santos, orgullu ho lia-fuan inkapasidade husi sira-nia kandidatura ne’ebé ema barak kestiona.
Lider Masimu Partidu Khunto, José dos Santos ‘Naimor’ Bukar konsidera di’ak liu povu Timor-Leste hili ema ne’ebé laiha kapasidade hodi sai Xefe Estadu duke hili ema ne’ebé iha kapasidade.
“Ha’u pesoal, ba povu Timor-Leste tomak, di’ak liu ita hili ema beik duke hili ema matenek. Ha’u fó parabéns ba Prezidente partidu Khunto (Armanda Berta) kandidata husi partidu Khunto nian ne’e ba povu Timor-Leste,” dehan Naimori bainhira hala’o kampaña eleitoral ba kandidatu PR, Armanda Berta, iha kampu futebol Lautem, munisipiu Lautem, Sabadu (05/03).
Tuir Naimori, bainhira ema ne’ebé laiha kapasidade mak kaer ukun nia sei bolu mós ema seluk hodi bele apoiu no ajuda nian nune’e nia sei la brani atu naok.
Ida ne’e diferente ho ema matenek ne’ebé bele uza ninia matenek hodi halo tuir de’it ninia hakarak.
“Ema dehan beik, ha’u agradese katak buat sei la monu leet, tanba nia (Berta) la hatene, nia (Berta) sei bolu ema ba lisuk buat hotu sei lao di’ak, nia (Berta) sei la naok, ne’ebé ha’u kolia fali ba povu tomak ida ne’ebé beik duke matenek halo tuir gostu sira-nia hakarak, ema hotu-hotu la haree, ne’e iha mundu, mundu ne’e hanesan ne’e nauk-teen ida kuandu ba nauk ema-nia sasan iha ema-nia uma se na’in 10-20, nia sei la brani, mais na’in ida mesak ba nauk ema-nia sasan nia brani tanba nia mesak, ne’ebé kuidadu ho buat ida ne’e,” deklara Naimori.
‘Privatiza’ Programa Governu
Ekipa susesu husi kandidatu PR, Armanda Berta, ‘privatiza’ programa governu ne’ebé Primeiru Ministru Taur Matan Ruak lidera, hahú husi programa subsidiu Covid-19, vasinasaun kontra Covid-19 to’o subsidiu ba inan isin-rua.
Prezidente Ekipa Susesu Nasionál, Marito Magno hatete, Berta sai nu’udar figura importante iha Timor-Leste tanba daudaun ne’e kaer kargu rua iha governu hanesan Vise Primeira Ministra no Ministra Solidariedade Sosial no Inkluzaun.
“Feto simples ida, mai husi suku ida, aldeia, mais bele ba kaer pasta boot rua, kargu boot ida iha ita-nia rai. Tanba ho kargu boot ne’e ita fó konfiansa ba nia atu ba Prezidente Repúblika. Pasta iha governu todan nia bele halo, Prezidente (Repúblika) nusa nia labele halo?,” deklara Magno liu husi kampaña iha kampu futebol Vikeke Villa, Munisipiu Vikeke, Sesta (04/03).
Tuir Magno, Berta ema matenek ida no ema ne’ebé iha lideransa maka’as tan ne’e iha governu nia konsege halo programa barak ba povu.
“Ita-boot sira mós sente saida mak nia (Berta) halo. Durante krize pandemia (Covid-19) nia (Berta) fó apoiu $200 dollar, imi sente ka lae? See mak halo? Armanda Berta dos Santos mak halo ba ita-boot sira. Nia politika mak lori mai ita boot sira.”
“Programa ida importante lori mai Vikeke, primeiru lugar ita-nia kandidata mak lidera komisaun planu de vasinasaun kontra covid 19. Primeiru Ministru fó fiar ba ita-nia kandidata mak lidera komisaun boot ida ne’e no susesu boot. Timor hetan aperesiasaun maka’as iha mundu, feto ida mak lidera laos mane. Foin daudauk ita-nia Primeiru Ministru ba simu premiu iha Australia, Timor hetan valor boot iha mundu tanba bele kombate Covid-19, ohin ita bele livre hanesan ne’e, tanba see? Tanba lideransa Armanda Berta halo,” dehan nia.
Aleinde ne’e, Magno hatutan, programa seluk ne’ebé Berta halo mak programa Bolsa Mãe jerasaun foun.
“Nia haree dook tiha ona, ita-nia inan sira kuandu isin-rua sira hahoris labarik má-nutrisaun, nune’e ema bolu dehan rais badak labele matenek, ne’e nia bele halo tansa Prezidente nia labele halo. Sei fó subsidiu ba inan sira, isin-rua sei simu $15 dollar, labarik moris mai nia ba $20 dollar, labarik moris mai mak defisensia entaun nia tenke hetan $30 dollar.”
“Matenek mak halo ida ne’e ka beik halo ida ne’e. Ida bé koalia barbarak ne’e halo ona ka seidauk?, haluha tiha de’it,” deklara Prezidente ekipa susesu nasionál ne’e.
Tan ne’e, Magno husu atu organiza malu, tama-sai uma hodi halo sosializasaun ba kandidatura Berta.
“Dere sira-nia odamatan dehan ba sira ‘lae, imi laos tama ami-nia partidu maibé imi hakarak hili feto ida ne’ebé matenek ne’ebé atu lori paz, estabilidade no promove dialogu iha ita-nia rai ne’e mak Armanda Berta dos Santos, laiha tan ema seluk,” nia hatete.
