Ho deve ne’ebé partidu haat ne’e iha, Naimori hein katak kandidatu Prezidente Repúblika husi Khunto, Armanda Berta dos Santos, sei hetan vitoria bainhira konsege hakat tama iha ronda daruak iha eleisaun Prezidensial.

Tuir Naimori, partidu politiku haat hanesan; CNRT ne’ebé lidera husi Xanana Gusmão, Fretilin ne’ebé lidera husi Francisco Guterres Lú Olo, PD ne’ebé lidera husi Mariano Assanami Sabino, no PLP ne’ebé lidera husi Taur Matan Ruak, sei selu sira-nia ‘tusan’ ba Khunto.

Naimori hatete, iha tinan 2017, partidu Khunto fó apoiu ba kandidatu Prezidente Repúblika husi Partidu Demokratiku, Antonio da Conceição ‘Kalohan’ ne’ebé kompete iha eleisaun prezidensial.

Iha tinan 2018, bainhira mosu eleisaun antesipada, Naimori dehan, CNRT no PLP bolu Khunto hodi forma koligasaun no ikus mai forma governu.

Hafoin CNRT sai husi governu, partidu Fretilin tama hodi tonka governu PLP ho Khunto.

“Iha 2017 kandidatu PR husi PD, Antonio da Conseicao ‘Kalohan’, Berta ba fó apoiu. PD seidauk selu. Eleisaun fali Maun Taur ho Maun Xanana bolu fali Berta halo oitavo Governu, sira na’in rua seidauk selu. Agora maun Xanana dook tiha. Maun Alkatiri ho Lú Olo ba avansa fali Berta mak halo, seidauk selu,” dehan Naimori bainhira realiza kampaña ba kandidatu PR husi partidu Khunto, iha Aileu, Segunda (14/03).

Naimor afirma, maske Berta seidauk halo buat boot ba partidu haat ne’e, maibé nia halo ona buat balun, no partidu hirak ne’e mak seidauk selu Berta nia apoiu ne’ebé fó ona ba sira.

Ho nune’e, nia espera katak bainhira Berta konsege tama iha ronda daruak, partidu hirak ne’e sei selu ‘tusan’ hodi apoiu Berta ba Prezidente Repúblika.

“Entaun ita iha esperansa katak se Berta tama segunda ronde ita manan tiha ona tanba sira seidauk selu favor,” dehan Naimori.