Naimori hatete, iha tempu kampaña ema balun tanis tanba hakarak hetan osan husi projetu hodi goza sira nia an rasik hodi haluha povu nia moris.

“Ema barak sa’e palku tanis tanba hetan projetu, manan osan,diferente ho ha’u, Naimori, sa’e palku tanis tanba haree kiak halibur kiak, ne’e ha’u tanis fuan ho laran, ne'e mak ita hotu tenke haree tanba la fasil,” Naimori konfesa ne’e iha kandidata Berta dos Santos nia kampaña iha Aileu, Segunda (14/03).

Naimori dehan, durante ne’e lideransa barak mak koalia atu hametin unidade nasionál maibé implementasaun laiha tan ne’e partidu Khunto hamriik atu halo juramentu ba foho no rai lulik hodi organiza artemrsiais sira sai familia ida iha TL.

"Maun sira hakilar  Unidade Nasionál maibé implementasaun laiha, la presiza kolia tan tanba ami hatene ona," dehan nia.

Tuir nia, la fasil atu halibur joven sira ne'ebé mai husi organizasaun ketak-ketak sai hanesan familia ida iha partidu Khunto nia laran.

Alende ne'e, Naimori promete ba povu tomak katak bainhira nia feen sai duni PR, durante tinan lima korrupsaun iha Timor-Leste laiha ona.

“Berta sai Prezidente nauk-teen sei lakon, ema dehan beik-teen, mais nia kakutak la hanesan sira hanoin. Vota took, tinan lima nia ukun sei iha mudansa,” nia garante.