Assanami informa, razaun fundamental hakarak sai PR atu hakotu konflitu ne’ebé aman sira iha.

La merese ona sira hambrik iha palku hodi trata no insulta malu, tempu ona sira deskansa fó konsellu ba jerasaun foun ne’ebé atu kaer ukun hodi nafatin dignifika pasadu no fó esperansa ba jerasaun foun sira.

Tempu to’o ona hapara ataka malu, akuza malu ne’e la importante, tanba jerasaun foun sira dadaun ne’e presiza kampu servisu, presiza edukasaun no saúde ne’ebé kualidade.

Aman sira otas tuan mai dadaun ona, maibé sira labele lakon esperansa tanba jerasaun ne’ebé uluk la’o hamutuk ho sira  ohin to’o nia otas atu hatutan fila fali obra ne’ebé mak iha sira nia kabas.

“La merese ona sira hambrik iha palku hodi trata no insulta malu, tempu ona sira deskansa fó konsellu ba jerasaun foun ne’ebé atu kaer ukun hodi nafatin dignifika sira,” dehan nia, iha Kampu Futebol Manatutu-Villa, Segunda (14/03).

Joven sira iha era independensia ne’e presiza goza sira nia vida, labele mosu tan joven ida mate iha luron tanba ema sona, joven ida labele hetan torturasaun no tama kadeia tanba de’it  situasaun ne’ebé la estavel.

Ohin la tempu ona atu joven sira asiste bebeik konflitu tradisionál, ne’ebé implika ba hamosu impase politika, halo ekonomia hakdasak.

Assanami husu deskulpa ba aman sira atu hapara ona insulta malu iha palku leten, tanba futuru joven ne’e importante.