Naimori hatete, membru governu ne'ebé la respeita desizaun husi Primeiru Ministru di'ak hasai, tanba Partidu KHUNTO sempre fó nia apoiu tomak iha governasaun to'o remata mandatu.

"Kuandu ida ne'ebé la asegura governu di'ak hasai, tanba ita ba delegasaun husi partidu ida atu servi ba povu se la kumpre ita-nia superior ne'e klaru PM haree katak sé mak lael ba VIII Governu, PM iha kompetensia tanba ami husi Partidu KHUNTO garante atu fó apoiu tomak tanba partidu tolu FRETILIN, PLP no KHUNTO sei metin nafatin," dehan nia, iha Likisa, Sesta (11/3).

Labele Nega KHUNTO

Governasaun ne’ebé daudaun ne’e lidera husi Primeiru Minitru, Taur Matan Ruak, iha partidu tolu mak servisu hodi ukun hamutuk hanesan Fretilin, PLP no KHUNTO. Maibé, ba Naimori nota, entre partidu tolu komesa atu sai inimigu ba malu iha governasaun ne’e.

“Se imi la sura ho KHUNTO to’o mate mós imi la kaer governu no prezidente ne’e hau Naimori mak ko’alia tanba oras ne’e iha VIII Governu partidu tolu PLP, FRETILIN, KHUNTO mas ha’u haree atu sai fali inimigu,” tenik nia.

Nia dehan, timoroan tenke hamutuk labele tarata iha tempu kampaña atu militante ho militante sira sempre estraga malu atu joven sira bele hanoin sira-nia futuru.

“Diak liu mai ita hamutuk labele tarata malu, labele hanoin para militante sira tuda malu lori bandeira iha kampaña halai tun-sa’e, nasaun demokratiku mas sira la hatudu pratika hada’u malu de’it kadeira mas la hadomi nia povu ida ne’ebé  sempre hetan problema” dehan nia.

Tanba ne’e, Naimori apela ba militante no simpatizante husi Partidu KHUNTO nian atu labele hanoin aat hodi respeita malu nafatin to’o iha tempu votasaun mak povu deside, tanba politika sai hanesan instrumentu de’it nein partidu atu fó han bainhira hetan problema.