Tuir Diretór Jerál STAE, Acilino Manuel Branco hateten, sentru paralelu tolu iha Munisipiu Dili rejista ona eleitór hamutuk 4,030 husi munisipiu 12, Inklui RAEOA sei vota iha Munisipiu Dili, eleisaun presidensiál 19 Marsu 2022.
“Ha’u hakarak informa katak, sentru votasaun paralelu iha Munisipiu Dili ita nia ekipa STAE rejista sira ne’ebé resensiadu ona hamutuk 4,030 sei vota iha sentru paralelu tolu iha Munisipiu Dili iha 19 Marsu,” dehan, Acilino ba jornalista sira iha edifisiu STAE, Kaikoli, Dili (11/03).
Sentru paralelu ne’ebé STAE estabelese mak hanesan, parte leste lokaliza iha eskola STM Bekora rejista eleitór sira husi Munisipiu Baukau, Lautem no Viqueque, iha parte Weste lokaliza iha GMT Kaikoli rejista eleitór sira husi Munisipiu Manatuto, Liquiça, Aileu, Ermera no Ataúro no iha parte Oeste lokaliza iha INAP Komoro rejista eleitór sira husi Munisipiu Ainaru,Bobonaro, Covalima, Manufahi no RAEOA.
Sentru paralelu tolu ne’e sei fasilita sidadaun timoroan ne’ebé husi Munisipiu mai iha Dili, laiha biban ba sira hodi fila ba moris fatin ho rajaun servisu no eskola inklui negosiu ne’ebé rejista ona.
“Ha’u husu ba sidadaun sira ne’ebé rejista ona iha sentru paralelu tolu to’o iha loro 02 marsu 2022, mak iha direitu atu vota iha dili, maibé sira ne’ebé la rejista ita sei la autoriza atu vota, husu sira ida idak tenke fila ba vota sira nia munisipiu no suku rasik,”dehan Diretór STAE ne’e.
Entretantu orariu rejistatrasaun hahú ona iha 18 Fevereiru no remata iha loron 2 Marsu 2022. Númeru eleitór hamutuk 4,030 mak sei tuir votasaun.
Tuir dadus ne’ebé anunsia ona iha jornal da Repúblika, ho númeru eleitór iha eleisaun presidensiál 2022-2027 total hamutuk 859,13. Eleitór rai laran 852,500, no leitór iha diaspora (rai liur) 7,113.
