“Ema dehan Berta sai prezidente bele halo buat ruma ka lae... Asesór sira mak halo hein ba lee de’it. Osan iha hela sira-nia oin,” dehan nia, iha kampu futebool Likisa, Sesta (11/3).
Tanba ne’e, nia dehan, iha TL organizasaun ne’ebé jovens sira sempre provoka malu iha fatin-fatin maka KORK, PSHT, IKS, 77, 55 no sira seluk, maibe Partidu KHUNTO konsege halibur sai familia unidade iha TL.
Tanba ne’e, Naimori jura ba foho no rai lulik Rramelau no Kablaki hodi prontu nafatin atu servi ba nasaun TL, maski iha públiku ema barak sempre keostiona kapasidade partidu KHUNTO nian, maibé Berta halo ona iha VIII Governu.
“Asesor mak ba halo tau iha meza leten hein ba lee deit ne’e dehan labele fali? Ne’e signifika laran moras karik,” dehan Naimori.
Nia hatutan, maski ema barak sempre halo kritika makaas ba kapasidade Partidu KHUNTO ninia kandidatu Armanda Berta, maibe Naimori sei la preokupa.
Nia dehan, feto ne'ebé mai ho simplisidade, respeita ema hotu só Armanda Berta karik, bainhira povu hili maka sei sai nu’udar prezidente Pepúblika ba povu tomak.
Tempu ona Ba Berta
Naimori hatete, iha Timor-Leste ne’ebé uluk luta ba rai ida ne’e iha frente tolu maibe frente rua mak ukun ona durante kada tinan lima nu’udar xefe estadu.
Nune’e, ba tinan ne’e povu tenke hili fali ema frente klandestina ida atu ukun, ne’e mak Armanda Berta dos Santos.
Tanba ne’e, Naimori apela ba partidu politiku sira hotu atu hili Armanda Berta, tanba bainhira manan sai nu’udar xefe estadu la haree kor, grupu no rasa, maibe sempre hakoak ema hotu nudar inan ida iha TL.
Nia dehan,bainhira maun boot sira kontinua la fiar malu no la rona malu hotu-hotu hakarak sai manan maka povu sei sai nafatin vitima iha rai ida ne’e.
