Tuir Diretór Interino FONGTIL, Helio Dias da Silva, hateten, kandidatu sira neebé involve labarik iha tempu kampaña ne'e krime, tanba tuir lei, bandu ema ho idade menus husi 17 labele partisipa iha kampaña no eleisaun, klaru katak sira nia tinan seidauk to'o.
"Ha'u hanoin liu-liu CNE ho STAE tenke foti medida ka asaun ruma, tanba ne'e ita dehan krime, tanba ne'e parte CNE tenke foti solusaun ida neebé lalais, sansaun ida ne'ebé hanesan maka'as uituan nunee tenke liu husi prosesu dalan legal," dehan nia online INDEPENDENTE iha nia knar fatin, Kaikoli, segunda nee (21/02).
Tanba ne'e, Sosiedade Sivil alerta ba Kandidatu Prezidente Repúblika sira no mós ekipa susesu, atu evita involve labarik sira iha prosesu kampaña.
Tuir nia, bainhira iha kampaña partidu politiku sira sei lori nia militante barak, nunee bele fó risku ba seguransa labarik sira nian.
"Ami Sosiedade Sivil sei kondena maka'as, bainhira Kandidatu sira involve labarik iha kampaña, tanba ida ne'e krime, nunee, ami husu CNE no STAE tenke foti medida medida rigorozu para prosesa sira tuir dalan legal,”tenik nia.
Tanba nee, nia informa ba Kandidatu sira atu konsiente hodi hatudu maturnidade no disiplina iha kampaña, tenke tau atensaun no evita labarik sira iha kamapaña.
Ekuantu, medida rigorozu neebé Sosiedade Sivil husu ba CNE atu aplika ba Kandidatu Prezidente Repúblika sira bainhira involve labarik sira tempu kampaña mak, kondena no prosesa sira tuir lei no dalan legal.
Entretantu, molok ne'e, Prezidente Institutu Defeza Direito das Criansa (INDDICA), Dinorah Granadeiru, hatete, sei prosesa Kandidatu Prezidente Repúblika sira neebé involve labarik sira iha kampaña politika. Tanba, relasiona ho prosesu kampaña ba Kandidatu Prezidente Repúblika ba periodu tinan lima nia laran, nudar Instituisaun neebé defende maka'as direitu labarik husu kandidatura sira labele involve labarik iha kampaña.
"Se labarik sira mak involve iha kampaña ka kandidatu sira utiliza iha kampaña, ami sei prosesa tuir baze legal neebé iha, no ami sei halo monotorizaun iha prosesu tomak,"dehan nia.
Nia akresenta, tuir Konstituisaun RDTL iha artigu 47 neebé koalia kona-ba direitu sufrájiu nian, iha pontu ida hatete, sidadaun hot-hotu ho tinan sanulu-resin-hitu (17) ba leten mak iha direitu atu vota no iha pontu rua hatete, hala’o direito sufrájiu ne’e katak kona-ba ema ida-idak no hanesan devér síviku ida.
Entretantu Prezidente Republika Francisco Guteres Lú Olo dekreta ona loron kampaña eleisaun neebé hahú iha loron 2 to'o 16 marsu no loron votasaun ba Eleisaun Prezidensiál hahú iha 19 marsu tinan nee.
Asistente Editor: Saturnina da Costa
