Iha 11 Jullu, horseik, Ministériu Transporte no Komunikasaun (MTK), Ministériu Agrikultura no Peskas (MAP) no Ministériu Rekursu Mineral (MPM) halo lansamentu ba implementasaun subsidiu kombustivel ba faze dahuluk.
Diretór Jerál MTK, Gaspar de Araujo informa, MTK no MAP hahú lansa subsidiu kombustivel ba benefisiariu sira ho totál orsamentu millaun $1.
Gaspar dehan, trasporte públiku sira hanesan taxi, mikrolete, bus, angguna no seluk tan sei ba simu voucher iha DNTT iha kada Munisipiu. Ba maritima nian sei simu iha Diresaun Nasional Transporte Maritima no aero nian simu iha AACTL.
"Husu ba Transporte Públiku sira hahú ohin (horiseik) ba oin simu ona vuocher ba ense mina iha estasaun (mina) iha rai laran, depois ami hein semana ida nia laran tenke hato'o invoice mai ami hodi prosesu pagamentu, depois ami prepara fali ba segunda faze," dehan nia liu husi nia diskursu iha lansamentu subsidiu iha Kaikoli, Segunda (11/07).
Tuir dadus, total transporte públiku ne’ebé sei simu voucher hamutuk 4.129. Subsidiu kombustivel ne’e sura hahú husi 2 Maiu to'o 31 Jullu.
Iha fatin hanesan, motorista mikrolete ida, José Maria, sente kontente tanba subsidiu refere bele hakaman uitoan sira husi problema folin kombustivel ne'ebé durante ne’e sempre sai preokupasaun.
"Ha'u kontente tanba governu fó kamaan ona mai ami, tanba ami lorloron ense mina ne'e karun, dala-ruma ami halai la hetan osan no osan hatama ba patraun ne'e menus, tanba loron ida tenke hatama $20 dollar," dehan nia.
