Tuir Reprezentante UNICEF iha Timor-Leste, Bilal Aureng Durrani, hatete, eskola barak mak Sei menus komputadór no asesu ba Internet no sei iha lacuna balun liga ho manorin sira nia kapasidade atu hanorin lisaun sira kona ba informasaun komunikasaun no teknolojia liu husi plataforma digital nian.

“Ita-nia komitmentu atu suporta asesu dijital iha sétor edukasaun Timor-Leste nian, la remata de'it ho entrega ekipamentu sira maibé ho kolaborasaun Diresaun Nasional Sistema Informasaun no Teknolojia, Diresaun Nasional Ensinu Báziku, no INFORDEPE, ita sei faslita tan treinamentu ba treinadór sira kona-ba IKT, ba treinador balun iha INFORDEPE ne'ebé sei kontinua fó treinamentu ba manorin no estudante sira iha eskola Ensinu Báziku hamutuk 30,”dehan nia, iha salaun konferensia Ministériu Edukasaun Vila-Verda, segunda (06/11).

Iha fatin hanesan Ministra Edukasaun Dulce de Jesus Soares mós husu ba professores hotu ne'ebé iha ona material IKT atu utiliza ho lolos.

"Tempu badak UNICEF ho Ministériu Edukasaun sei halo avaliasaun iha ita bo'ot sira nia eskola atu hatene efetividade husi ita bo'ot sira nia utilizasaun IKT ne'e rasik".

Entretantu, ekipamentus ne’ebé UNICEF entrega ba Ministériu Edukasaun hamutuk laptop 20, komputadór haat, mákina impresaun koloridu haat, makina scanner rua, projetor haat, toner ualu no tespack 12 no pasta ekola hamutuk 150 ne'ebé sei distribui ba eskola labarik sira iha área rural.