Ministru Prezidensia Konsellu Ministru , Fidelis Leite Magalhães, hatete, programa ne’e ho objetivu atu hadi’a kondisaun sira abitalidade husi uma ne’ebé sai nuudar hela fatin permanente ba uma kain sira ne’ebé vulneravel liu, bainhira uma sira ne’e aat hela no uma-kain sira ne’e la iha uma seluk atu hela ba.

“Uma-kain ne’ebé vulneravel liu, iha kontestu ezekusaun programa UKL+, mak sira ne’ebé ninia rendimentu médiu loroloron la liu dolar amerikanu $1,25 sentavus no sira ne’ebé nia uma aat hela,”dehan nia iha Palasiu Governu, segunda ne’e (09/05).

Governante ne’e haktuir, uma  kain ne’ebé vulneravel liu, bele benefisia tuir modalidade apoiu sira hanesan tuir mai, a). Apoiu finanseiru ba obra benefisiasaun, konservasaun ka reparasaun husi ninia hela fatin, to’o valór másimu dolar amerikanu $1.3000.

b). Apoiu liu husi materiál sira konstrusaun nian ba substituisaun materiál sira kobertura no revestimentu husi ninia hela fatin, to’o valór másimu dolar amerikanu $4.000.

Entretantu,  Konsellu Ministrus aprova ona  projetu Dekretu-Lei ne’e iha loron 06 fulan-maiu tinan 2022, maibé tanba alterasaun balun mosu iha faze redasaun finál nian, tenke submete fali ba Konsellu Ministrus atu aprova. Dekretu-Lei ida ne’e estabelese rejime espesiál aprovizionamentu ne’ebé haree liu ba ezekusaun medida UKL+.

Ho rejime foun ida ne’e, ba oin sei prevee opsaun rua, ida, ho atribuisaun subvensaun liu husi estrutura suku PNDS, no ida seluk ho posibilidade atu halo aprovizionamentu sentralizadu, hodi bele hetan ekonomia eskala no poupansa ba rekursu ekonómiku.

Enkuantu, Proposta Lei ida ne’e sei submete ba Parlamentu Nasionál.