Sekretariu Jerál TLPU, Zezito da Silva, hatete, bainhira TLPU simu informasaun katak, PSIK haruka karta notifikasaun ba Xefe Redasaun Jornal INDEPENDENTE Jorgino dos Santos no Jornalista Domingos Gomes.

Iha konteudu karta refere diriji ba pessoal, atu tuir prosesu inkérisaun, nuudar testamuña ba krime falsifikasaun dokumentus notasaun téknika, punidu no previstu iha artigu 303 Kódigu Penal Timor-Leste.

Enkuantu, iha prosesu inkeritu, TLPU rona informasaun husi Jornalista Domingos Gomes katak, iha ámbitu inkeritu la bazeia ba konteudu karta notifikasaun, maibé liga fali ho notifikasaun anterior kona ba publiksaun notisia iha Jornal INDEPENDENTE.

Ba ida ne'e, TLPU hanoin katak, Autoriedade Seguransa liliu PSIK la merese atu halo investigasau ba pesoal refere.

“TLPU husu atu hapara ita boot sira nia aktus sira ne'e, liliu PCIC, PCIC tenki haree katak, karta notifikasaun ne'ebé haruka ba pesoal ne'e, tenki inkeritu ho ema pesoal ne'e, labele lori fali ema pesoal, liga fali ba públikasaun jornalista sira nian,”dehan nia ba Jornalista sira iha edifisiu PSIK, sesta (23/12).

Nia dehan, sé bainhira koalia kona ba jornalista, TLPU haree katak, durante ne’e, Jornalista nia públikasaun la halo krime ida.

Tanba jornalista servisu profisional bazeia ba lei komunikasaun sosial no kode étika jornalista, tanba ne'e iha preokupasaun ba publikasaun ruma, tenki trata tuir lei komunikasaun sosial.

 Tanba iha lei komunikasaun sosial iha artigo 34,  hatete klaru kona ba direitu resposta no retifikasaun.

Ho nune’e, bainhira jornalista ba prezente iha PSIK, ida ne’e hanoin katak, ameasa boot ida ba liberdade imprensa iha Timor, ne’ebé iha mundu azíatiku, TL nia Liberdade imprensa iha númeru 17, ne’e diak los.

Maibe tentativa ne'ebé agora autoridade seguransa sira halo, ne'e hamate no ameasa jornalista sira, ida nee nia implikasaun mós ba Estadu ne’ebé atu adere ba ASEAN.

Tanba ne’e, TLPU nafatin firme hodi halo akompañamentu ba prosesu sira ne'ebé PSIK halo hasoru jornalista sira.

Entretantu, SekJer TLPU ne’e, husu ba jornalista hotu nafatin apoiu malu hodi defende liberdade imprensa no liberdade espresaun hodi hametin nafatin estadu ida ne'ebé iha direitu demokratiku.

“Tanba ne'e mak ami hanoin katak prosesu ne’e lao nafatin senáriu boot ida sei mai tan, sei halo manifestasaun boot ida hasoru autoridade sira ne'ebé hakarak kontra nafatin jornalista sira bainhira jornalista sira defende sira ninia servisu ida ne'ebé ho profisional,”hakotu nia.