Komunidade Fatuhada, Lamberto Britis, hateten, sira preokupa tanba sira nia naran la tama iha lista benifisiariu ba subsidiu fin-do-ano $200 nian iha suku refere.

"Ami  preokupa ba subsidiu $ 200 fin-do-ano, tanba ami nia naran laiha lista,” dehan nia iha Sede Suku Fatuhada, kinta ne’e (22/12).

Nia haktuir, tuir informasaun ne’ebé sira simu husi Xefe Suku katak, iha loron 23 Dezembru ne’e pagamentu remata ona.

Naran ne’ebé laiha lista pagamentu subsidiu fin-do-ano, nia haktuir, uluk subsidiu Covid-19 nian, sira mós hetan sira nia direitu, maibé iha subsidu fin-do-ano, sira nia laran laiha lista.

Nia akresenta, kuandu la hetan nafatin subsidiu $200 ne'e, sira sei ezize ba parte relevante atu nune’e bele hetan sira nia direitu.

Iha fatin hanesan, Xefi Suku Fatuhada Marcelino Soares hateten, komunidade sira hato'o ona sira nia prekupasaun tanba sira nia naran iha lista pagamentu ba subsidiu fin-do-anu.

Xefe Suku dehan, molok atu halo pagamentu, konsellu suku prepara hotu ona lista sira hodi haruka ba MAE ho MSSI.

Maibé lista sira ne’ebé haruka mai fali husi atu halo pagamentu, komunidade balun naran laiha lista.

Entretantu, tuir dadus, total benifisiariu ba subsidiu fin-do-ano iha Suku Fatuhada hamutuk 3.111.