“Ami sei la hamenus propinas ba estudante-sira tanba durante eskola paradu ha’u orienta nafatin professor-sira hodi halo rezumu ba estudante-sira liu husi online no ofline. Bainhira Governu haruka ami redúz propinas entaun MEJD tenke ajuda mós ami maibé Governu promete de’it ho ibun tutun mós hanesan de’it,” Diretór Jerál eskola São Pedro, Pe. Matias Pinto, SDB   hateten iha Komoro, tersa horseik (19/10).

Durante ne’e, MEJD promete ona ba eskola privada no públika-sira katak sei fó subsídiu pulsa internet ba estudante-sira hosi Ensinu Báziku no Ensinu Sekundária, maibé to’o agora laiha, ho Ida ne’e oinsa haruka eskola privada sira hamenus tán propinas ba estudante-sira.

Bainhira MEJD haruka eskola privada-sira hamenus propinas, Governu mós tenke hanoin professor-sira ne’ebé servisu hodi fasilita estudante sira iha situasaun serka sanitária liuliu kontratadu sira.

Totál estudante iha eskola ne’e hamutuk 1.500, hosi númeru ne’e kompostu Ensinu Báziku hamutuk 700 no Ensinu Sekundáriu hamutuk 800.

Totál professor hamutuk 91 kompostu hosi kontratadu hamutuk 60 no Governu 35.

Propinas ba estudante sira kada fulan selu $10, maibé sira selu pakote, ho ida-ne’e kada fulan tolu foin selu dala Ida.

Tanba ne’e, ba estudante sira ne’ebé mak to’o agora seidauk selu propinas husu ba inan aman sira bele ba informa direta ba eskola.

Molok ne’e, Ministru Edukasaun Juventude no Desportu, Armindo Maia, apela ona katak, Eskola privada sira bele fó toleránsia ba estudante sira ne’ebé mak to’o agora seidauk selu propinas, atu nune’e sira bele tuir ezame, tanba durante ne’e eskola hotu paradu no ativade lubuk mós paradu ho Ida ne’e inan aman sira difisil atu hetan osan.