MEJD Husu Eskola Privada Sira Hamenus Propinas

By Adelaide dos Santos Outubru 20, 2021 312
Ministru Edukasaun Juventude no Desportu (MEJD), Armindo Maia. Foto:Dok/INDEPENDENTE. Ministru Edukasaun Juventude no Desportu (MEJD), Armindo Maia. Foto:Dok/INDEPENDENTE.

DILI: Ministériu Edukasaun Juventude no Desportu (MEJD) liuhosi Serbisu Edukasaun Munisípiu Dili, apela ba eskola privada inklui eskola Katólika-sira atu hamenus propinas ba estudante-sira, durante pandemia Covid-19.

Diretór Servisu Edukasaun Munisípiu Dili, Duarte Braganza, hateten durante situasaun Covid-19 Governu suspende atividade ensinu aprendizazen iha kapitál Dili, tanba ne’e husu ba eskola privada-sira atu hamenus propinas ba estudante-sira.

“Ho situasaun ida ne’e ita suspende atividade eskola nunee bele evita transmisaun moras ida ne’e. Tanba ne’e, ita hakrak husu ba eskola privada sira hanesan eskola Katólika, eskola komunidade, eskola international sira labele husu propinas 100% ba inan-aman sira, tanba iha situasaun ida ne’e família barak ekonomia la to’o hodi sustenta uma laran inklui selu oan sira nia  eskola,” dehan nia iha edifisiu servisu edukasaun munisípiu Dili Komoro, egunda (18/10).

Antes ne’e mós Ministru Edukasaun Juventude no Desportu (MEJD), Armindo Maia, informa ona katak, eskola privada sira bele fó toleránsia ba estudante-sira ne’ebé to’o agora seidauk selu propinas, nune’e sira bele tuir ezame, tanba durante ne’e atividade iha eskola hotu-hotu paradu tánba situasaun Covid-19.

Rate this item
(0 votes)

Independente Digital TV