Segunda, 27 Setembru 2021 | Login
PM Taur Matan Ruak simu vasina AstraZeneca ba dahuluk, iha Sentru Saude Formosa Dili, kuarta (7/4). Foto GPM. PM Taur Matan Ruak simu vasina AstraZeneca ba dahuluk, iha Sentru Saude Formosa Dili, kuarta (7/4). Foto GPM.

Simu Vasina Dahuluk, Taur Enkoraja Sidadaun Simu Vasina Kontra Covid-19 Featured

DILI:Primeiru-Ministru, Taur Matan Ruak afirma dala ida tan, nia prontu sai ema dahuluk ne’ebé sei simu vasina tipu AstraZeneca kontra Covid-19, no enkoraja sidadaun sira hotu atu simu vasina hodi bele hakbiit imunidade kontra virus SarsCov-2, nune’e evita iha kazu óbitu, tanba to’o agora peritu saúde seidauk hatene bainhira mak pandemia ne’e lakon propagasaun hosi ema ba ema.

“Vasina ne’e sei halo povu Timor-Leste bele hakbiit liután nia an hodi kombate moras ne’e, atu nune’e evita ema mate barak. Covid-19 ita hotu nia inimigu, ita labele husik Covid-19 manán ita, mai hamutuk ita kombate Covid-19,”dehan Primeiru-Ministru.

Entretantu, Xefe Governu agradese tebes ba apoiu no kooperasaun hosi Organizasaun Mundiál Saúde (OMS), UNICEF no parseiru dezenvolvimentu sira hotu iha durante ba prosesu ne’e, ne’ebé Timor-Leste felizmente iha segunda semana ne’e asesu ona faze dahuluk doze 24.000 liuhosi sistema COVAX.

Xefe Ezekutivu garante katak,  Governu sei esforsu nafatin  atu iha tan karregamentu sira seluk  tuir mai, nune’e timoroan hotu bele hetan vasina ne’e hodi hadook an hosi virus SarsCov-2.

Ikus liu, Xefe Governu agradese no  parabeniza Vise-Primeira-Ministra, Dra. Armanda Berta dos Santos ba esforsu hotu lidera Komisaun Interministerial ne’ebé trata asuntu vasinasaun, embora hasoru difikuldades oioin, maibé ikus mai vasina AstraZeneca iha segunda semana ne’e to’o duni Timor-Leste.

Tuir observasaun Online Independente ba lansamentu dahuluk vasinasaun AstraZeneca, hatudu katak, Primeiru Ministru simu vasina dahuluk, daruak mak Prezidente Parlamentu, tuir mai Prezidente Tribunal Rekursu, Eis-Prezidente Republika Timor-Leste, ArseBispo Metropolitania Dom. Virgilio do Carmo, reprezentante Organizasaun Mundial Saúde iha Timor-Leste, reprezentante UNICEF iha Timor-Leste no mós membru Governu sira seluk.  

Fundus ba vasinasaun ne’e husi Nasaun Unida ba Infánsia (UNICEF) liuhusi COVAX fasilita AstraZenaca doses rihun 24 ba Timor-Leste.

AstraZenaca ba faze dahuluk ne’e to’o iha Timor-Leste iha loron 5 fulan-Abril tinan 2021.

 

Jornalista: Saturnina da Costa

Editor: Jose Sarito Amaral

Read 229 times
Rate this item
(0 votes)