Iha atividade ne’e hanesan parte husi programa prioritáriu SEKoop iha IX Governu Konstitusionál atu promove no dezenvolve produtu Bafo Kayrala hanesan matéria-prima potensial ba indústria no konsumu lokal. Koilleta dahuluk ne’e hatudu katak produsaun iha área refere lao diak no iha perspetiva favorável ba merkadu iha futuru.

Sekretáriu Estadu Kooperativas, Arsénio Pereira da Silva fó apresiasaun ba produtór no kamponez sira, inklui funsionáriu tékniku sira ne’ebé fó apoiu durante prosesu plantasaun to’o koilleta. Nia hateten katak bafo kayrala iha kapasidade atu koilleta to’o dala tolu iha tinan ida tuir kondisaun rai no jestaun agríkola.

“Produtu ida ne’e la’ós deit bele sai matéria-prima ba serveja, maibé mos bele fornese ba programa merenda eskolar no indústria seluk. Residu sira mos bele uza hanesan hahan ba animal, nune’e kadeia valor husi bafo kayrala ida ne’e luan tebes no bele aumenta rendimentu ba kamponez sira,” hateten Sekretáriu Estadu Kooperativas, Arsénio liu husi Komunikadu ne’ebé Media INDEPENDENTE asesu husi Media-SEKoop, Domingu (07/03).

Iha okasiun ne’e mos, SEKoop husu ba produtór sira atu tau atensaun ba kualidade produtu, liu-liu iha faze pós-koilleta, atu asegura konfiansa husi kompania komprador sira, inklui kompania Heineken ne’ebé sei sosa produtu ne’e hodi prosesa sai serveja.

Ikus liu, Sekretáriu Estadu Kooperativas orienta ba diresaun téknika sira atu fasilita formasaun ba Grupu “Lalamu Laman” hodi hasa’e kapasidade jestaun no produsaun iha futuru.

Iha parte seluk, Reprezentante PAM Munisípiu Lautém, atual Sekretáriu Munisipal ba Asuntus Planeamentu, husu ba dirijenti no membru grupu sira atu kontinua hametin koordenasaun no solidariedade hodi garante sustentabilidade grupu ne’e iha futuru.

Iha tempu hanesan, Reprezentante Grupu Baltazar da Costa Nunes, husu ba Governu, liu-liu Sekretaria Estadu Kooperativas, atu kontinua fó apoiu ba grupu liu husi fasilitasaun formasaun bázika no apoiu material atu prevene animal sira tama estraga plantasaun.

Purtantu, serimónia koilleta ne’e hetan partisipasaun husi Administrador Postu Administrativu Lospalos, Diretór Geral SEKoop Eng. Olderico Lopes, reprezentante Komandante PNTL Munisípiu Lautém, kargu diresaun no xefia sira, reprezentante edukasaun, reprezentante ADRA, inklui mos kamponez sira iha área Soru.

Enkuantu, atividade ne’e konsidera hanesan pasu importante hodi hametin kolaborasaun entre governu, setor privadu no komunidade agríkola hodi promove dezenvolvimentu agríkola iha Munisípiu Lautém.