Tuir Komunikadu ne’ebé Online INDEPENDENTE asesu, husi pajina SASCAS, ralata, komunidade na'in-20 ne'ebé hetan apoiu ekipamentus ne’e, durante hala'o sira nia knaar hanesan traballadór pinera rai henek iha mota Komoro.
“Ekipamentus ne’ebé fó ba komunidade sira atu hodi halo servisu mak hanesan, karosa, kanuru boot, luvas liman, olku, kapasete salva ulun, ropa, lona, rede no seluk tan,”haktuir komunikadu.
Tanba ne'e, komunidade hirak ne’ebé hala’o servisu iha mota Komoro, senti kontenti tebes ba inisiativa husi SASCAS ne’ebé mak fó fundus ba komunidade liu husi ADBN.
Hafoin entrega tiha materiál hirak ne’e ba Komunidade sira, Diretor Ezekutivu SASCAS Edvin Duarte Soares Noronha informa, SASCAS la sosa ekipamentus, maibé SASCAS hanesan servisu públiku ida, ne’ebé tutela ba iha Primeiro Ministro hodi Jere Orsamentu Subvensaun Publika hodi tau matan ba iha Sosiedade Sivil sira.
Aleinde ne'e, Ezekutivu ne’e hatutan, dadauk ne’e SASCAS hala’o parseira ho ADBN ne’ebé hala’o deskobrementu ida iha mota Komoro, katak, komunidade sira presija teb-tebes ekipamentus hodi buka moris liu husi pineira rai henek.
Tan ne’e, SASCAS fó apoio orsamentu ho total dolar amerikanu $15,000.00 ba ADBN hodi sosa ekipamentus ba komunidade sira.
Ezekutivu ne’e akresenta, SASCAS mós iha ona planu, ba futuru, atu oinsa mak suporta sosiedade sivil sira hodi fó atensaun ba traballador sira nia saúde, tanba pinera rai henek ne’e presija mós tratamentu diak ida ba sira nia saúde.
Entretantu, tuir dadus, benifisiariu sira iha mota Komoro ne’ebé sei hetan benifisiu husi ekipamentu pineiru ne’e hamutuk ema na’in 54.
