"Ha'u hanoin iha kompromisiu diak tebes husi konvidadus sira, liu-liu orgaun relevante ne'ebé iha kompetensia, ita iha SEII rasik, iha komprimisiu ida ne'ebe diak tebes, katak SEII sei hamutuk ho movimentu feto sira oinsa tenta hodi bele haree kona-ba revizaun lei kontra violensia domestika,”dehan Prezidente Rede Feto, Zelia Fernandes, iha salaun Delta Nova, kinta horseik (02/06).
Nia hatutan, bainhira lei kontra violensia domestika ne’e eziste, sosiedade sivil haree katak, vitima sira hahú iha konsensia atu koalia sai no hato’o keixa ba parte kompetente sira.
"Hafoin lei ne'e implementa iha tinan 2012, ita hare katak, iha progresu ba vitima feto sira, barak mak iha ona konsensia hodi halo keisa formal ba iha instituisaun estadu no mós kazu ne'ebé sira hasoru iha uma laran, entaun ne'e progresu ida," hatutan nia.
Nia haktuir, maske, vitima barak mak hato’o ona keixa, maibé kazu violensia domestika nafatin akontese iha sosiedade nia leet. Ida ne’e hatudu katak, iha buat ruma ne'ebé mak seidauk di'ak, entaun iha artigu balun ne'ebé mak iha kodigu penal ida, maibé iha lei kontra violensia domestika laiha.
Nune’e, nia dehan, iha duni nesesidade atu halo fali revizaun ba lei kontra violensia domestika.
Ho nune’e, Rede Feto sei kolabora ho Vise Prezidente Grupo Mulher Parlamentar Timor-Leste, hodi tau matan no defende ba direitu feto nian.
Iha Fatin hanesan, Sekretária Estadu Igualdade no Inkluzaun (SEII), Maria Rosario Fatima Correia, hateten, bainhira lei kontra violensia domestika vigor , feto barak mak komesa relata ona sira nia kazu tuir sistema formal.
Maibé, tuir nia, seidauk iha artigo espesifiku ida kona ba lei kontra violensia domestika.
"Ita mós seidauk iha artigu espesifiku ida, ita mos sei hamutuk ho Rede Feto, atu halo revizaun ba lei kontra violensia domestika, tanba lei kontra violensia domestika vigor iha tinan 2012, ita seidauk halo revizaun, SEII hanoin hela atu halo revizaun, tanba iha artigu balun ne'ebé ita mensiona iha kodigu penal, maibé ita la mensiona iha lei kontra violensia domestika," nia akresenta.
“Porezemplo hanesan, dano simples no dano abrofantos, ita la preve iha lei kontra violensia domestika, ida mós kazu insestu mós numeru maka'as,”hakotu nia.
