“Ha’u pesoalmente oferese ha’u-nia uma iha Metiaut ba maluk Arte Moris, nune’e bele rai sasán ne’ebé sira iha, tanba ha’u triste bainhira obra sira ne’ebé ita-nia joven sira halo tinan barak nia-laran tenke hasai rai de’it iha areadór,” dehan nia iha serimonia abertura ba forum diálogu Dili, kona-ba mídia konvensionál iha era dijitalizasaun, iha Delta Nova, kinta ne'e (2/12).

Tuir Horta,  bainhira Governu iha hanoin deside hasai joven-sira iha Arte Moris bele, maibé tenke hanoin didi’ak no buka fatin seluk ne’ebé dignu ba sira.

“Ha’u rona fatin ne’ebé Governu liuhusi Terras no Propriedade oferese ba arte moris laiha estrada atu tama, tanba ne’e sira kontinua halo diálogu atu hetan solusaun, maibé seidauk iha, Polísia haruka ba hasai ona,” nia relata.

Nia hateten, Governu la presiza halo nune’e, tanba bele halo Timor-Leste nia-naran sai a’at.

Nune’e, sasán sira ne’ebé daudaun ne’e hasai tau de’it iha areadór Arte Moris, haree hanesan rejime komunista, sunu livru no destroi arte sira.

Tanba ne’e, Governu tenke fó hanoin didi’ak ba joven sira hodi kontinua nafatin halo kreatividade.

Iha sorin seluk, Prezidente Asosiasaun Arte Moris, Iliwatu Danabere, triste ho desizaun Governu nian, tanba sira tenke husik fatin ne’ebé sira hela kleur ona.

“Desizaun ne’ebé Governu fó, loron aban tenke sai husi Arte Moris ne’e tristeza boot, tanba ami seidauk iha fatin loloos atu uza,” nia dehan.

Nune'e Presidente Arte Moris ne'e apresia ho inisiativa Horta nian, ne’ebé bele ajuda iha situasaun difisil nia laran.

“Ha’u sente kontente ba Eis Prezidente Ramos Horta ne’ebé sempre iha ba ami iha tempu ne’ebé de’it, liuliu iha situasaun agora bainhira ita-nia Governu mai hasai arte sira ne’ebé durante ne’e ami halo, tau de’it iha li’ur, horikalan ami simu ona informasaun katak provizóriu ami sei rai sasán iha nia uma,” hakotu nia.

Asistente Editor: Saturnina da Costa