Diretór ADTL Cesário da Silva husu ne’e tanba situasaun defisiénsia la’ós nia mak hakarak, maibé Ida ne’e planu Maromak no natureza nian.
“Situasaun ne’ebé mak ami akompaiña katak barak liu inan aman sira esklui tiha husi oan ne’ebé mak ho Defisiénsia. Ho ida ne’e ami hakarak husu ba inan aman sira atu bele para ona esklui ema ho Defisiénsia, hodi assesu ba moris iha públiku nia laran,” nia hateten iha salaun City 8, Manleuana, tersa (30/11).
Tuir dadus ne’ebé mak iha, ema ho Defisiénsia iha territóriu laran tomak ne’e hamutuk 38.118.
Husi númeru ne’e, ema ho Defisiénsia barak liu mai husi munisipiu Ermera ho totál 4.000 resin, tuir fali munisipiu Baucau no Vikeke inklui Dili.
ADTL Asegura Planu
ADTL realiza semináriu hodi assegura politika planu, programa no alokasaun Orsamentu Jerál Estadu (OJE) ba dezenvolvimentu asuntu ema ho Defisiénsia.
Objetivu husi semináriu Ida ne’e hodi foku ba assegura politika planu programa OJE sensibel ba asuntu ema ho Defisiénsia.
“Ho Ida ne’e ita bolu entidade relevante sira liuliu governante liña Ministériu sira ne’ebé mak iha relevante hanesan Ministériu Edukasaun Juventude no Desportu (MEJD), Sentru Formasaun Profissional no Empregu (SEFOPE), Ministériu Saúde (MS), Ministériu Solidariedade Sosial no Inkluzaun (MSSI) inklui liña Ministérial sira ne’ebé mak hala’o kna’ar ba asuntu ema ho Defisiénsia nian iha ita nia rain,” Cesário da Silva hatete iha salaun City 8, Manleuana, tersa (30/11).
Politika programa hirak ne’ebé mak sira aprova bele iha seriedade ba alokasaun, liuliu alokasaun atu assegura rekursu sira hodi bele implementa planu sira ne’ebé mak iha, liuliu foku ba planu asaun nasionál Defisiénsia nian ne’ebé aprova iha fulan kotuk.
Situasaun Ida ne’e, ema ho Defisiénsia barak liu iha área rurál hasoru situasaun inkluzaun partisipasaun moris iha públiku, maioria ema ho Defisiénsia barak mak komete husi inan aman sira, inklui mós sira ne’ebé mak moris iha kapitál Dili.
Iha kapital Dili agora daudaun ema ho Defisiénsia hamutuk 3.000 mak agora dadaun ADTL seidauk hatene no hetan sira nia hela fatin agora iha ne’ebé, ho Ida ne’e Planu ba oin ADTL hakarak asegura liuliu mellora advokasia, nune’e ema hotu bele ko’alia kona-bá direitu ema ho Defisiénsia nian iha Timor-Leste hodi lian ne’e bele forte liu tán iha futuru.
Tuir observasaun husi ADTL nian katak to’o agora ema ho saúde mentál barak mak sei la’o abandona iha fatin públiku, tanbá ne’e pressiza fatin provizoria ba ema ho saúde mentál.
Iha fatin hanesan, Prezidente Komissaun F trata asuntu saude, siensia sosiais no igualdade Jeneru iha Parlamentu Nasional, Noé Ximenes afirma, OJE 2022 ne’ebé mak sira tau ba ema ho Defisiénsia ho montante millaun $203.
Tuir fiskalizasaun PN komissaun F trata asuntu Saude observa katak, Barak liu iha munisipiu Vikeke, Bobonaru barak liu ema ho Defisiénsia la rejistadu, tanbá ne’e sira husu ba ADTL atu nune’e bele rekolla dadus husi ema ho deifisiénsia iha munisipiu hotu.