Diretór Ezekutivu ADTL, Cesário da Silva hateten, totál ema ho defisiénsia iha Timor-Leste hamutuk 25.000 mak seidauk assesu ba edukasaun.
“Ita espera katak, ba futuru ita bele kria kondisaun ida ne’ebé di’ak hodi assegura maluk Defisiénsia sira atu partissipa iha edukasaun inkluzivu,” Cesário da Silva hateten iha salaun City 8, Manleuana, Segunda (30/11).
Ema ho Defisiénsia hakarak atu assesu ba iha nível edukasaun ida ne’ebé ás, maibé fatór ida ne’ebé mak impede makás maka assesibilidade fiziku, tanba kuaze eskola sira laiha assesibilidade.
Ho Ida ne’e, Planu asaun ba tinan 2021-2030 iha Ministériu 11 mak hola parte iha planu asaun nasionál ne’e, tuir Ida-idak nia papél atu halo saida ba asuntu Defisiénsia, ezemplu hanesan MEJD atu assegura ema hotu ba iha edukasaun ho Ida ne’e meta Ida husi Ministériu Edukasaun, no Ministériu Saúde estabelese sentru provizóriu atendimentu ba ema ho saúde mentál.
ADTL mós hakarak assegura ema ho Defisiénsia sira hodi fasilita sira assesu ba iha oportunidade sira ne’ebé mak iha, iha setór importante sira hanesan edukasaun, saúde no seluk tán inklui assegura ema ho Defisiénsia sira nia direitu hodi partissipa iha atividade hotu ne’ebé mak iha, hanesan sidadaun TL.
Molok ne’e, Ministru Edukasaun Juventude no Desportu Armindo Maia, Asina kontratu ho organizasaun Defisiénsia neen iha TL ne’ebé mak fó apoiu ba ema ho Defisiénsia sira iha edukasaun inkluziva.
Apoiu finanseiru ne’ebé mak MEJD apoiu ba organizasaun Defisiénsia neen ne’e mak hanesan AHDMTL, KDT-TL, Fuan Nabilan, Alma sister, Madre Buruma no Agape ho Orsamentu hamutuk $25.000, no kada organizasaun hetan $4.000-resin.