Ministru Francisco hato’o kestaun ne’e hafoin selebrasaun tinan 26 PNTL no tomada pose ba Komando foun PNT, iha Palasiuu Governo.

Tuir Ministru, xave atu rezolve problema ne’e iha komunikasaun intensivu entre dirijente sira no membru relevante sira.

"Ha'u husu ona ba Komandante Jerál atu kria komunikasaun ida di'ak entre sira.Entre sira mós presiza iha komunikasaun, presiza mós reuniaun beibeik, presiza mós ko'alia ba malu beibeik par atu dehan katak ‘lae (nu’udar) Ofisiál Superiór,ita mak tenke asegura instituisaun ida ne'e’,” dehan Ministru, ba jornalista sira, Sesta (27/03).

Nia afirma, nu’udar instituisaun seguransa estadu nian, profisionalizmu PNTL depende maka’as ba kna’ar ofisiál superior sira-nian hodi mantein dixiplina no governasaun interna.

Francisco informa mós katak agora daudaun governu halo hela revizaun ba kazu Julia Gama nian, inklui aspetu regulatóriu sira ne'ebé relasiona ho direitu promosaun nian.

"Ami mós haree hela, halo diskusaun ba nia (Julia Gama) hotu par depois foti desizaun sira ne'ebé di'ak,” dehan nia.

Nia hatutan, oportunidade promosaun ba Julia Gama nakloke nafatin, naran katak prosesu tomak tenke kumpre regulamentu ne’ebé vigora iha instituisaun polísia nia laran.

Liután, Ministru subliña importánsia atu harii kultura komunikasaun no diálogu iha PNTL nia laran atu konflitu internu sira bele rezolve ho konstrutivu.

"Ha'u  fiar katak sira na'in rua (Komandante foun) ne'e idaidak iha nia kapasidade, tanba ne'e mak ha'u fiar katak sira sei jere ne’e ho didiak,” nia afirma

Nia espera, lideransa foun PNTL bele husik hela eransa pozitivu liu husi hametin disiplina, profesionalismu, no kultura dialogu, nune’e bele kontribui ba estabilidade seguransa no dezenvolvimentu nasional iha Timor-Leste.

Molok ne’e, polémika kona-ba promosaun ofisiál superior PNTL iha 21 Marsu 2026 hamosu krítika husi organizasaun sosiedade sivíl sira.

Organizasaun feto, Fokupers, hamutuk ho rede advokasia, avalia katak iha indikasaun diskriminasaun iha prosesu promosaun, partikularmente hasoru membru feto sira.

Prezidente Board Fokupers, Domingas Fernandes Alves ‘Micato’ hatete, hanesan parte ida husi movimentu luta ba igualdade jéneru, sira sente nesesidade atu hato'o sira-nia preokupasaun kona-ba situasaun ne'e.

“Ami respeita konstituisaun, ami respeita estatutu PNTL, ami respeita lei sira ne'ebé mak iha maibé ami kontra atitude ne'ebé mak diskriminativa,” dehan Micato, liu husi Konferénsia Impresa iha edifisiu Fokupers, Farol, Kinta (26/03).

Nia esplika, kazu ne’e mosu hafoin ofisiál feto ida revela katak nia hetan tratamentu ne’ebé la justu iha prosesu promosaun iha PNTL nia laran.

Tuir nia, nu’udar instituisaun seguransa estadu nian, PNTL tenke sai ezemplu hodi tane aas prinsípiu igualdade no justisa.

"Ita hotu luta ba ukun rasik an, ita hotu luta ba igualidade jéneru, ita hotu luta ba prinsipiu direitu demokrátiku, ita hotu luta ba Konstitusaun. Siginifika katak ita labele husik liu desigualidade, diskriminasaun, prátika enkoretas ne'ebé mak mosu iha institusaun, sá tan instituisaun siguransa,” dehan nia.

Iha fatin hanesan, Diretora Ezekutiva Fokupers, Domingas Afonso, husu ba Ministériu Interiór atu foti medida lalais no loke investigasaun ba alegasaun diskriminasaun ne’e.

"Ami fiar katak Ministériu Interiór hola papél importante atu bele haree no prosesa investigasaun ba kazu ida ne'e,” dehan nia.