Timor-Leste sai membru ONU iha loron 23 Setembru 2002, hafoin simu pose iha enkontru Jerál ONU nian, iha loron 27 Setembru 2002, hafoin restaurasaun independénsia TL iha loron 20 Maiu 2002.
"Timor-Leste sai ona membru ba Nasoins Unidas dezde 2002, ne'ebé hamriik ho nia misaun atu tulun nasaun hotu-hotu ne'ebé hasoru problema. Misaun sira ne'ebé Nasoins Unidas hala'o iha Timor-Leste hanesan iha área edukasaun, sosiál, jéneru no labarik sira hasoru problema no área sira seluk," dehan komunikadu ne'ebé diáriu ne’e asesu, iha Sábadu (24/9).
Xefe Estadu, orgullu tebes ho Timor-Leste nu'udar nasaun soberanu ida ho nasaun sira seluk iha mundu no simu protesaun husi organizasaun internasionál sira ne'ebé sai, hanesan ponte ba dezenvolvimentu TL iha pasadu ba futuru ne'ebé di'ak liu.
Hafoin eventu ne'e, Xefe Estadu hamutuk ho delegasaun kontinua hala'o soru-mutu bilaterál ho Primeiru Ministru Nova Zelándia, Jacinda Ardern no Primeiru Ministru Kamboja, Hun Sen, iha Sede ONU nian.
Objetivu husi soru-mutu ne'e atu hametin liután kooperasaun bilaterál entre TL ho Nova Zelándia no Kamboja.
Entertantu, tuir oráriu, Prezidente Repúblika, José Ramos Horta, sei hala'o enkontru ho Sekretariadu Jerál ONU, António Guterres, iha Novaoorke, Estadus Unidus Amérika (EUA).
