Xefe Kaza Sivil Prezidensia Republika Francisco Maria Vasconcelos hateten, Prezidente Repúblika hanoin tebes oinsá atu tulun vitima sira, tanba ne'e Prezidénsia Repúblika fo tulun balun, responsabél tomak governu nian.
Maibé, Prezidente Repúblika hanesan aman ba povu tomak, nune’e meius oinsá atu tulun vitima sira hodi rekupera fali sira nia hela fatin.
"Ajudus ida ne'e hanesan formas ida Prezidente Repúblika nia responsabilidade, prezidente nia domin ba ita-boot sira, maske la barak, maibé importante la'ós sasan ne'e. Importante mak ita-nia relasaun, ita-nia domin no hanesan umanu, hanesan aman no oan sira," dehan nia iha komunikadu ne’ebé Online INDEPENDENTE asesu, segunda horseik (18/10).
Xefe Kaza Sivil mós fó hanoin ba autoridade atu kordena ho governu liuhusi diresaun Bombeiros atu bele hala'o edukasaun sivika ida oinsá atu hasoru inséndiu, tanba komunidade eis merkadu Komoro afeita ona inséndiu ba dala rua.
Entretantu tuir lista ne'ebé mak iha, família hamutuk 217 mak simu apoiu hanesan, Semente saka 657, besi kotak hamutuk 1752, baut kalen kaixa 438 no roupa sakola 219.
Asistente Editor: Saturnina da Costa
