Tuir komunikadu ne'ebé diáriu ne’e asesu Ordem Camões nu’udar Orden Onorífika Portugeza ne’ebé rekonesimentu nivel aas ba pesoal sira ne’ebé ajuda habelar língua Portugueza iha mundu.
Xefe Estadu José Ramos Horta konsidera, kondekorasaun ne’e nu’udar rekoñesimentu importante, ne’ebé la’òs atribui de’it ba nia, maibé Governu Portuges oferese mós ba lider nasionál sira hanesan, Kay Rala Xanana Gusmão, Taur Matan Ruak, Marí Alkatiri no Fransisco Guterres Lú Olo hodi hametin lasu amizade entre Timor-Leste no Portugal.
“To'o agora ne’e ha’u hetan kondekorasaun boot tolu ne’ebé Governu Portugues fó ba ha’u. primeiru kondekorasaun, Ordem Liberdade, Portugal, (1998), Ordem Dom Infante Portugal (2011) no terseiru mak Ordem de Camões nu’udar Ordem Honorífica Portuguesa hanesan orden ida kee aas liu, tanba ita nia relasaun di’ak loos entre Timor no Portugal,” dehan Xefe Estadu.
Xefe Estadu hatete, medalha Ordem Camões hanesan orden ida aas liu ne’ebé Xefe Estadu Portugés atribui de’it ba nivel Xefe Estadu sira bainhira hala’o vizita estadu hodi hametin kooperasaun bilateral.
Entretantu, durante ne'e Xefe Estadu hetan ona rekoñesimentu prémiu mundiál hanesan, Premiu Novel da Paz (1996), Orden de Austrália (2015),Ordem Timor Leste (2012),Ordem Dom Boaventura (2006), Orden de Brazil, Kuba, Guinea-Bissau no Kabu Verde.
