“Ha’u mai informa ba Prezidente kona ba klima ambiente amizade iha parlamentu Nasional ohin (horseik) aprova ona votasaun final global ba Orsamentu Retifikativu,”dehan PM ba Jornalista sira iha Palasiu Prezidensial, Aitarak Laran, kinta (24/08/23).

PM Xanana dehan, tuir regra normal, Parlamentu Nasionál liu husi komiaun C, ne’ebé trata Asuntu Finansas no Públikas sei halo redusaun finál, molok entrega ba Prezidente Repúblika sei hare durante semana ida, antes promulga.

IX Governu Xanana rekoñese servisu lubuk ida halo revizaun ba lei sira inklui hadia sistema finansas Timor-Leste importante hodi hadia hikas konfiansa banku no mundu internasionál kona-ba Timor-Leste nia transparansia iha programa no ezekusaun orsamentu.

“Ha’u informa mós ba Prezidente kona ba revizaun lei sira, inklui lei amnestia, tanba situasaun iha Timor prizaun nakonu, kazu barak seidauk julga, ita buka hadia lei, hodi estadu la’o ho konfiansa,”dehan PM.

Iha fatin hanesan, Prezidente Repúblika, José Ramos-Horta agradese ambiente demokrasia iha Parlamentu Nasionál halo votasaun finál global ba Orsamentu Retifikativu (OR).

“Ha’u fó parabens ba Governu no Parlamentu Nasional ne’ebé halo votasaun ba programa no orsamentu governu liu ho unaminidade, ne’e hatudu parseria foun konstritivu ba rai ida ne’e” PR Horta agradese.