Embaixador Repúblika Indonézia ba Timor-Leste, Okto Dorinus Manik informa, partisipasaun Xefe Governu Xanana importante tebes hodi hato’o Timor-Leste nia hanoin ba pais membru ASEAN tomak.

Konfrensia Nivel Altu ASEAN ne’e rasik sei hala’o durante loron tolu, 5 too 7 Setembru 2023, iha Jakarta-Indonézia.

“Ha’u mai atualiza partisipasaun Primeiru Ministru, Kay Rala Xanana Gusmão atu iha Konferensia Tingkat Tinggi Assosiasaun Rejionál Sudeste Aziatíku, iha Jakarta ne’e importante tebes ba Timor-Leste,”informa Embaixadór iha komunikadu ne’ebé Online INDEPENDENTE sita, (24/08).

Entretantu, Primeiru Ministru Xanana rasik agradese ho konvite ne’e no sei partisipa iha konfrensia nivel altu ne’e hodi asiste mós serimónia hand over Prezidente Repúblika Indonézia, Joko Widodo entrega hikas baindeira ASEAN ba Prezidente Laos, Thongloun Sisoulith maka sei sai uma na’in ba ASEAN iha tinan ne’e.

Istória Assosiasaun Rejionál Sudeste Aziatiku harii iha loron 8 fulan-Agostu tinan 1967 iha Bangkok, Tailandia, ho asinatura deklarasaun hosi Fundadór sira nasaun, Indonézia, Malázia, Filipina, Singapura no Tailándia no Brunei Darussalam tama iha loron 7 Janeiru 1984, iha loron 28 Jullu 1995, Laos PDR no Myanmar iha loron 23 Jullu 1997, no Kambodia iha loron 30 Abril 1999, enkuandu Timor-Leste foin hetan estatutu nu’udar obserbador no sei sai membru ASEAN iha tinan 2025.

Iha 2003, ASEAN lansa Komunidade ASEAN bazeia ba pilár tolu, hanesan Komunidade Seguransa ASEAN, Komunidade Ekonomika ASEAN no Komunidade Sosiál Kulturál ASEAN.