Provedór Virgilio hato’o kestaun ne’e hafoin simu reprezentante EUTL, iha edifisiu PDHJ, Kaikoli, Kinta (30/10). Iha sorumutu refere, EUTL hato’o sira-nia lamentasaun kona-ba implementasaun Lei Manifestasaun nú.1/2006, liu-liu artigu ne’ebé regula kona-ba distansia metru 100 husi edifisiu públiku.

“Kona-ba lei manifestasaun ne'e, ami hanesan Provedor, iha opiniaun hanesan ho EUTL katak lei ne'ebé ke fó distansia 100 metrus ba sidadaun halo manifestasaun ne'e anti demokrátiku,” dehan Lamukan.

Maske konkorda ho hanoin husi EUTL, maibé, nia dehan, PDHJ labele husu fiskalizasaun ba Tribunal tanba molok ne’e tribunal halo ona fiskalizasaun no pronunsia ona katak lei metru 100 ne’e la viola konstituisaun.

“Anaunser iha esforsu polítiku seluk atu halo alterasaun ba lei ne'e liu husi Parlamentu, maibé pelumenus nível ne'ebé ke Provedor bele halo, halo fiskalizasaun ne'e labele ona tanba iha fiskalizasaun tiha ona ba lei ne'e,” nia esplika.

Enkuantu, Portavoz EUTL, Natalizio Nunes Martins hatete, audensia ho PDHJ ne’e ho objetivu atu husu PDHJ ninia prespetiva ba lei manifestasaun, no hato’o mós preokupasaun estudante sira nian kona-ba ba lei manifestasaun.

EUTL konsidera katak lei ida ne'e limita tebetebes direitu sidadaun nian atu hato’o sira-nia hanoin hasoru desizaun polítika ruma ne'ebé la loos.