Iha inisiu jogu bainhira arbitru fó orientasaun,  ekipa rua lansa kedan kontra atake ba malu, maibé Ekipa Manufahi domina liu bola kompara ho Ekipa Viqueque.

Ekipa Manufahi hala'o jogu husi ain-ba-ain, ho kombinasaun husi liña los ba karuk, hodi invade liña agresivu Ekipa Viqueque ni'an, maibé liña agresivu Ekipa Manufahi la fó fatin ba Manufahi hodi lansa sutu ruma.

Nune'e, Ekipa Viqueque ne'ebé mai ho estilu jogu ho dook, nune'e bainhira hetan bola lansa kedan ba liña defensiva Manufahi ni'an, no konsege lansa sutu ida, maibé seidauk kona nia tarjeitu.

Maibé, jogu la'o to'o minutu 11, Ekipa Viqueque, liu husi nia jogadór, Nicson Ximenes, konsege hatama uluk golu bá rede Ekipa Manufahi nia hodi hatudu score ba 1-0

Husi jogu ne'e, Ekipa Manufahi responde kedan iha minutu 37, liu husi jogadór, Protagio hodi muda score ba 1-1.

Nune'e, jogu ekipa rua la'o ho emosaun maka'as  liu tán, tanba iha estádiu adeptus husi ekipa rua barak iha tribuna leten hodi suporta ba ida-idak nia ekipa favoritu.

Suporta maka'as husi adeptus husi ekipa rua halo jogu ho intensidade maka'as liu tán, maibé to'o primeira parte termina la iha tan golu ruma, nune'e rezultadu mantein impata 1-1.

Hakat ba segunda parte, Ekipa Viqueque hasa'e kedan kedan ritmu jogu hodi buka produs tán golu, maibé sei trava husi jogadór Ekipa Manufahi.

Husi esforsu hirak ne'e to'o minutu 64, Ekipa Viqueque liu husi nia jogadór, Manuel Bareto, hatama tán golu ida ba rede Manufahi ni'an, hafoin aproveita lansa bola muta, hodi muda score ba 2-1.

Ho golu ne'e, Ekipa Viqueque servisu maka'as liu tán, ho bola husi ain-ba-ain, nune'e iha minutu 70 no 73  Jogadór Manuel Silva konsege responde hikas golu hodi muda score ba 3-2.

Husi golu ne'e, Ekipa Viqueque esforsu ho tátika oi-oin, atu halo impata jogu, nune'e iha minutu 85 Viqueque hetan oportunidade hodi xutu penalidade, maibé iha penalidade ne'e la konsege halo jogu, tanba bola la kona tarjeitu.

Ritmu jogu ekipa rua manas liu tán, Ekipa Viqueque tenta fó presaun, maibé la iha oportunidade, nune'e mós Manufahi hasa'e liu tán intensidade jogu hodi aumenta golu, maibé la konsege, to'o segundu parte termina rezultadu 3-2.

Purtantu, Ekipa Asosiasaun futebol  Munisipiu Manufahi, sei hein jogu entre ekipa Asosiasaun Futeból Ermera kontra Ekipa Asosiasaun Dili Leste.

Manufahi fiar an hiit kampiaun

Purtantu, Ekipa Futeból Mane Asosiasaun Manufahi fiar an sei hit kampiaun Kopa Juvenil Sub-17, ne'ebé sei kontra Ekipa Mane Asosiasaun Futeból Dili Leste, ne'ebé sei realiza iha estádiu munisipal Dili, Sexta loron-31 fulan ne'e.

Treinadór Asosiasaun Futeból Manufahi, Rizal Nurdin hatete, nia parte fiar an katak  sira sei sai kampiaun iha jogu ohin.

"Ami fiar an, maske jogu ne'e sei difisil, maibé bola kabuar, nune'e ami sei hatudu jogu másimu iha finál no ami fiar aan bele sai kampiaun," Afirma nia, ba jornalista jornal INDEPENDENTE, iha estádiu munisipal Dili, Kinta (30/10).

Nia hatutan, sira tuir kompetisaun husi nivel munisípiu to'o sai vensedór iha rejiaun II Asosiasaun Futeból Manufahi.

"Tanba ne'e ami iha ona mehi hakat bá finál mezmu hasoru dezafiu, maibé garante bele sai kampiaun, tanba ami  halo preparasaun másimu," Dehan nia.

Treinadór Asosiasaun Futeból Manufahi ne'e esplika, jogadór sira presiza hadi'a liu tán tátika no téknika bainhira kontra Dili Leste.

Entretantu, kompetisaun Kopa Juveníl Sub-17 mane sei hala'o finál Manufahi no Dili Leste inklui Viqueque sei kontra Ermera hodi hadau terseiru lugár iha loron-31 outubru ne'e.