Nia dehan, Timor-Leste dadauk ne’e sofre má nutrisaun no inseguransa ai-han, tanba ne'e Movimentu hadi'a nutrisaun visita Timor-Leste hodi servisu hamutuk ho intidades sira hotu atu hadi'a ai-han ne'ebé seguru no nutrisaun ne'ebè di'ak ema hotu.
Nia hatutan, tinan rua liu ba, TL adere ona ba movimentu hadi'a nutrisaun liu husi karta ne'ebé mai husi Primeiru Ministru atu sai hanesan membru ba dala-62 husi membru 65 ne'ebé iha.
“Hanoin problema má nutrisaun importante tebes tanba ne’e liu husi karta ne'e, husu hodi oinsa atu bele apoiu di'ak liu tan atu bele hadia lalais má nutrisaun iha Timor-Leste," dehan nia iha sala VIP Aeroportu Internasional Nicolau Lobato Komoro, Segunda ne’e (28/11).
Nia haktuir, iha sira nia visita, husu Governu atu tau prioridade liu ba problema má nutrisaun, tanba ne'e sira sei foku ba nutrisaun, liliu ba inan isin rua ba to’o bebe tinan rua.
"Governu halo ninia prioridade ne'ebé foku liu ba nutrisaun, tanba ne'e, ami manten nafatin iha nutrisaun liliu tau matan ba inan isin-rua to'o ih bebé tinan rua," nia hato'o.
Iha fatin hanesan, Pontu Vokal Movimentu Hadi'a Nutrisaun iha TL, Filipe da Costa hatutan, Sekretaria Jéral ONU nia vizita durante loron lima ne’e, sei halo hala'o atividade lubuk ida, inklui hasoru malu ho Presidenti Republika, Primeiro Ministru, no mós Bankadas parlamentares sira.
Aliende, sei hasoru malu ho sosiedade sivil, setor privado, universitariu, Konsellu Nasional Juventude Timor-Leste (CNJTL) ne'ebé planeia ona, no espera katak ho vizitasaun ne'e bele inspira liu tan programa sira atu rezolve má nutrisaun iha TL.
Entretantu, Asistente Sekretáriu Adjuntu Organizasaun Nasoins Unidas (ONU) Gerda Verburg to’o iha Aeroportu Nikolau Lobato Dili, iha tuku 12:15 Otl, ho aviaun komersiál Citilink, no simu direita husi koordenadór movimentu hadi’a nutrisaun Timor-Leste, Reprezentante husi Ministériu Negósiu Estranjeiru, Gabinete Koordenadór Rezidente ONU iha Timor-Leste, Reprezentante husi Programa ai-han Mundiál (WFP) United Nation Children Fund (UNICEF), no Organizasaun Saúde Mundiál (OMS).
