Embaxador Xina iha Timor-Leste Xiao Jiangou hatete, ohin aviaun Citilink husi Indonesia ne’ebé aluga husi Governu Xina.
"Aviaun Citilink husi Indonesia ne’e ohin tula pasajeiru hamutuk na’in 134. Entre sira ne’e mesak injineiru ne’ebé antes ne’e balun servisu iha Oli Pezadu Hera no Portu Tibar, ohin sira fila-fali mai, tanba Governu Timor-Leste mak presija sira nune’e ohin ha’u mai hasoru sira,"dehan nia iha Airoporto Internasional Nicolau Lobato Comoro, Dili, ohin (14/04).
Tuir regras ne’ebé Governu estabelese iha situasaun Estadu Emerjensia no Serka Saniatria ,pasajeiru sira ne’e sei ba karantina durante loron 14 iha Ótel sira ne’ebé antes ne’e Governu prepara.
Iha fatin hanesan Vise Ministru Bonifasio Maucoli informa, ohin mós Ministerio Saúde desloka moras hamutuk na’in 32 ba halo tramentu saúde iha Jakarta, tanba pasiente sira ne’e moras kleur ona iha Hospital Nasional Guido Valadares (HNGV), maibé tanba Aviaun la iha nune’e husi parte HNGV adia pasiente sira nia viajen ba Jakarta.
"Agredese tanba Aviaun Citilink ne’ebé aluga husi trabalhadores Xina mai iha Timor-Leste nune’e, ohin ita aproveita hodi haruka ita nia pasiente ne’ebé moras ne’e ba Jakarta hodi hetan tratamentu espesifiku liu atu bele salva sira nia vida”.dehan nia
Tanba ne’e Governu Timor-Leste mós agradese ba Governu Xina liu hosi Embaixador Xina iha Timor-Leste ne’ebé durante ne’e sempre ajuda medikamento no ekipamentu saúde nian hodi kombate surtu Covid -19.
Vise MS ne’e mós relata, Governu Xina ajuda mós material ba prevensaun Covid-19 nian hanesan, termus scanner no ekipamentu balun hodi suporta ba servisu Nasional Laboratorium nian.
Entertantu Diretor Consorsium Citilink iha Timor Leste, Fernando da Silva hatete, ohin aviaun Citilink bele semo mai Timor-Leste tanba hetan autorizasaun husi Ministerio Transporte no Telekomunikasaun (MTK) iha loron 13 fulan-abril.
Nune’e nia rasik halo kontaktu ho sentru Citilink iha Jakarta hodi bele lori pasajeiru husi Xina hamutuk 134 mai Timor-Leste.
Aliende ne’e mós Aviaun ne’e tula fali pasiente moras hamutuk 32 husi Timor Leste ba Jakarta Indonesia hodi kura sira nia moras.
Jornalista:Camilio de Sousa
Editor:Jose Sarito Amaral
