Sexta, 25 Juñu 2021 | Login
Governu Australia Fó Apoiu Material Toneladas 27 Mai TL.Foto:Camilio/Independente Governu Australia Fó Apoiu Material Toneladas 27 Mai TL.Foto:Camilio/Independente

Governu Australia Fó Apoiu Material Toneladas 27 Mai TL Featured

DILI:Governu Australia fó apoiu umanítaria ho material toneladas 27 mai Timor-Leste hodi ajuda ba vitima dezastre naturais ne’ebé akontese iha loron 4 fulan-abril.


Material hirak ne’e tula husi aviaun forsa defeza Australia nian ho naran Boeing Royal Australian Air Force C-17 Globemaster no to’o iha Aeroportu Internasional Nikolau Lobato, Comoro Dili, iha oras tuku 14:45 oras Timor-Leste.
Embaxador Australia iha Timor Leste Petter Robert informa katak material asistensia ne’e hamutuk toneladas 27 resin no mós material preparasaun ba hahan nian, material tenda no mós material ijíeneku nian.
“Ohin loron material asistensia emerjensia hamutuk tonelada 27 resin,inkluindu material preparasaun hahan, material tenda nomós ijeniku nian to’o iha Dili Timor Leste. Material hirak ne’e hola parte iha Australia nia pakote asistensia emerjensia ho montante AUD miliaun $7 ba Timor Leste hafoin inundasaun iha tempu paskua foin lalais ne’e.dehan nia iha Aeroportu Internasional Nikolau Lobato, Comoro Dili, ohin (14/04).
Nia hatutan, ekipa asistensia mediku Australianu nian ida (AUSMAT) mós halo viajen tuir aviaun ida ne’e no hanesan epidomiolojista senior no ofisial asistensia Saúde nian sei servisu hamutuk ho Ministeriu Saúde nia ekipa vijilansia ne’ebé dadaun ne’e jere hodi responde ba COVID -19.
“Material asistensia emergensia ne’e sei distribui liu hosi Australia nia parseiru umanitaria nia no ONG sira no mós ekipamentus Protesaun Pesoal (PPE) sei aumenta ba Governu nia stock ne’ebé hetan estragus hafoin inundasaun ne’ebé hanesan kontinuasaun ba PPE kilogram 500 husi Australia iha semana kotuk,"tenik nian.
Nia informa katak material asistensia emerjensia hirak ne’e hodi aumenta ba Australia nia apoiu imideatemente ne’ebé fornese ona ba ema barak iha sentru evakusaun sira.
Tanba ne’e Australia Orgulho tebes hala’o servisu hamutuk ho Governu Timor-Leste hodi apoiu no responde ba Covid-19 no mós rekoperasaun ba inundasaun.
Iha Fatin hanesan Sekretario Jeral Ministeriu Negosio estranjeiru no Kooperasaun asuntu Bilateral, Jorge Camões iha nia intervensaun katak, Governu Australia sai hanesan amigu ida ne’ebé sempre ajuda Timor-Leste iha situasaun defisil ruma.
"Lori Governu Timor-Leste nia naran hato’o agradesemento profundu ba solidaridade ajudus ne’ebé Governu Australia oferese mai Timor-Leste hodi ajuda kombate Covid-19 no vitima inundasaun sira.” Tenik nia

 

Jornalista:Camilio de Sousa

Editor:Jose Sarito Amaral

Read 907 times
Rate this item
(0 votes)