Iha Konstituisaun RDTL konsagra iha artigu 56 koalia kona-ba direitu sidadaun sira nian ba protesaun sosial, asistensia no seguransa sosial.
“Protesaun sosial atu fó protesaun ba ema vulneravel sira liu-liu ferik-katuas, labarik no ema ho defisiensia,”dehan nia iha serimonia ba “Bazes Jerais ba Protesaun Sosial” iha Hotel City8 Manleuana Dili, kinta horseik (05/08).
Nia hatutan, medidas ba protesaun sosial liu husi mekanismu kontrutivu no naun kontrutivu, hanesan apoia ema ne’ebé falta rendementu ka rendementu insufisiente, dezempregu ba ferik-katuas, ba ema ne’ebé uma laran la sufisiente, liu-liu ba labarik no mós ema ho defisiensia.
“Ita nia Governu Timor-Leste, kria medida protesaun sosial hodi preve ona iha lejislasaun hodi adapta mudansa protesaun sosial tuir tempu, ba legislasaun kona-ba pratika nasional hodi kria protesaun sosial iha Timor-leste, maibé seidauk define lolos lei baze protesaun sosial nian,”tenik nia.
Iha fatin hanesan Reprezentante Diretór CSTL, Armerio Vila Nova rekomenda ba Governu liu husi MSSI atu elabora liu tan sistema protesaun sosial ba traballador sira iha sistema informal ba agrikultura subtansia no traballador domestika, atu nune’e ema hotu bele hetan protesaun bainhira sira infrenta situasaun ruma.
“Ita hare'e ba situasaun atual, ita nia povu, familia no traballador barak mak infrenta hela situasaun hanesan, lakon rendementu hodi sustenta moris uma laran,”dehan Armenio.
Tanba ne’e, nia espera katak, ba oin Governu liu husi MSSI bele estabelese sistema protesaun sosial ne’ebé adekuadu no forte hodi reponde ba situasaun ema hotu nian.
Asistente Editor: Saturnina da Costa
