Adjuntu Reprezentante UNICEF iha Timor-Leste Emmanuelle Collet hatete, apoia ne’e atu suporta labarik no familia vulneravel sira iha ambitu emerjensia, hodi lao hala’o tuir medida politika ben estar ba oan sira iha familia nia laran.

Ho nune’e, programa ne’e bazeia iha komunidade atu prevene no resolve problema violensia domestika, abuzu no abandona labarik.

Nia hatutan, sasan ne’ebé apoia ba ONG ba Futuru mak hanesan, pasta 150, material desportu nian, brinkedu, material papelaria sira.  

Sasan hirak ne’e, atu fahe ba voluntaria sira hodi halo atividade MHPSS nian ho labarik sira iha komunidade afetadu iha fulan hirak liu oin mai.

Emerjensia sira hanesan pandemia Covid-19 no inundasaun husi Sinklone Seroja disturba fator protesaun labarik no Familia sira nian iha nivel individual, komunitariu no sosial. Sira iha tendensia atu hatodan problema sira hanesan violensia hasoru labarik sira, violensia domestika no pobreza.

Sira mós kauza estragus ba rede sosial sira, estrutura komunitaria, rekursu sira, no servisu sira mak iha impaktu ba inan-aman sira nia abilidade atu kuida sira nia oan sira. Emerjensia mos bele afeita labarik sira nia bem estar psikososial.

“UNICEF no MSSI, hanesan parte ida husi programa reforsa forsa serbisu bem estar sosial, dezemvolve kaixa feramentu saude mental no apoia psikososial hodi apoia labarik no familia vulneravel sira no iha ambiente emerjensia, adaptadu bazeia tuir ba politika sistema bem estar ba labarik no familia. Nune’e, Governu komprometidu atu enkoraja programa bazeia ba komunidade hodi prevene no hasoru violensia domestika, abuzu no abandona labarik,”dehan nia iha Raikotu, sesta ne’e (06/08).

Hanesan parte intervensaun ida husi MHPSS, husi fulan-Abril 2021, MSSI ho UNICEF kolabora ho ONG 8 no organizasaun foinsa'e  estabelese ona fatin ksolok ba labarik sira, fornese ba labarik sira iha sentru deslokasaun 13 (9 iha Dili 4 iha Hera) ho oportunidade asesu ba jogu estruturadu sira, rekreasaun no deskansa ida ho forma fortese reziliensia no fator protesaun ezistente sira.

Nune'e mos MSSI no UNICEF sei fo formasaun ba Osial Protesaun Labarik sira, GBV-Fokal Point, ajente saúde komunitaria sira, reprezentante organizasaun relijioju sira no voluntaria primeiru sokoru no kaixa feramentu MHPSS, atu bele reforsa servisu bem estar sosial sai ekipadu di'ak liu hodi oferese apoiu psikososial ba labarik no familia sira.

Programa apoiu saúde mental no psikososial hetan apoia husi Departamentu Relasaun Exterior no Komersiu husi Australia no Uniaun Europeia-United Nations Sportliht Initiative iha Timor Leste.

Entretantu Diretor Jeral MSSI Rui Expostu, agradese ba parseiru internasional no nasional sira ne’ebé servisu hamutuk ho MSSI hodi responde ona ba situasaun ne’ebé ema hotu infrenta.

Iha fatin hanesan, Diretora ONG ba Futuru, Juliana de Souza Marcal hatete, ONG ba Futuru hamutuk ho parseria metin ho MSSI atu bele kontinua programa sentru amigavel ba labarik sira, produtividades ne'ebé  planu  ona, agora daudaun NGO ba Futuru nia ekipa identifika  hela de'it sentru evakuasaun 5 mak seidauk eziste.

Nune'e, tama ba planu ida ne'e sei lori ba iha komunidade tanba ba Futuru nia ekipa mós identifika ona komunidade 13 ne'ebé  kontinua aktividades ida ne'e.

"Ami Ba Futuru foti responsabilidade ida ne'e, sei la implementa mesak, ami sura nafatin ita hotu nia kontribuisaun, ita hotu ninia partisipasaun liu liu grupu sira ne'ebe eziste tiha ona desde inisiu Futuru sei kordena fila fali atu nune'e bele kontinua lori aktividade ida ne'e, atu implementa iha komunidade ne'ebe mak ita identifika ona," Diretora ne'e dehan.

Asistente Editor: Saturnina da Costa